Берасцейцы маюць намер правесці шэсць пікетаў супраць акумулятарнага завода

У Менгарвыканкам пададзеныя заяўкі на пікеты супраць будаўніцтва акумулятарнага завода пад Берасцем.

У Менскі гарвыканкам 22 чэрвеня накіраваны заяўкі на правядзенне шасці пікетаў супраць будаўніцтва акумулятарнага завода пад Берасцем. Заяўнікамі выступіла група жыхароў Берасця і Берасцейскага раёна, паведамляе tut.by са спасылкай на БелаПАН.

Тры пікеты вызначаюцца на пляцоўцы каля будынка Адміністрацыі прэзідэнта на вуліцы Карла Маркса, яшчэ тры - ля Дома ўрада на плошчы Незалежнасці, паведаміў адзін з заяўнікаў акцый Дзмітрый Бекалюк.

Колькасць удзельнікаў у кожнай трохгадзінны акцыі - сем чалавек.

Мэта пікетаў - выказванне пратэсту супраць будаўніцтва завода свінцова-кіслотных акумулятарных батарэй «АйПауэр» паблізу Берасця і шэрагу населеных пунктаў Берасцейскага раёна, інфармаванне аб парушэннях, дапушчаных ужо існуючымі прадпрыемствамі групы кампаній «1АК».

«Мы хочам звярнуць увагу на гэты праблемны завод вышэйшых органаў дзяржаўнай улады. Нам здаецца, што берасцейскія чыноўнікі спрабуюць замяць незадаволенасць людзей супраць гэтай небяспечнай вытворчасці», - сказаў Бекалюк.

Ён адзначыў, што раней актывісты падавалі заяўкі на правядзенне ў Берасці шэрагу акцый супраць будаўніцтва акумулятарнага завода. Берасцейскі гарвыканкам санкцыянаваў толькі адну: 29 красавіка мітынг «берасцейкі супраць свінцу» на ўскраіне Берасця, у парку Воінаў-інтэрнацыяналістаў, на які сабралася блізу дзвюх тысяч чалавек.

Мясцовая ўлада забараніла ўсе заяўленыя акцыі ў цэнтры Берасця. Падставай для забароны стала тое, што ў адпаведнасці з пастановай гарвыканкама на заяўленых пляцоўках не дапускаецца правядзенне масавых мерапрыемстваў. З аналагічных прычын Берасцейскі райвыканкам не дазволіў правядзенне пікетаў пад лозунгам «Заводу тут не месца» побач з будаўнічай пляцоўкай акумулятарнага завода.

Акумулятарны завод на прамысловай пляцоўцы «Аэрапорт» у свабоднай эканамічнай зоне «Берасце» будуе ТАА «АйПауэр» - рэзідэнт СЭЗ. Падрадчык - кітайскае ТАА «Аньхойская знешнеэканамічная будаўнічая карпарацыя». На заводзе будзе наладжаны поўны цыкл вытворчасці свінцова-кіслотных акумулятарных батарэй.

Жыхары Берасця і Берасцейскага раёна мяркуюць, што прадпрыемства пагражае іх здароўю. Амаль 37 тысячаў подпісаў супраць будаўніцтва завода былі перададзеныя ў Адміністрацыю прэзідэнта ў лютым. Аднак урадавая камісія не выявіла парушэнняў у рэалізацыі праекта будаўніцтва завода. 17 траўня на гэты адказ была накіраваная адпаведная скарга на імя Аляксандра Лукашэнкі.

Акрамя таго, 11 траўня на імя Лукашэнкі быў накіраваны зварот жыхароў Берасця і Берасцейскага раёна з просьбай вызваліць ад пасады старшыняў берасцейскага аблвыканкама, гарвыканкама і райвыканкама ў сувязі са стратай даверу. Пад гэтым дакументам падпісаліся 3226 чалавек.

З 25 лютага кожную нядзелю на плошчу Леніна ў Берасці прыходзяць праціўнікі будаўніцтва акумулятарнага завода. Яны стаяць групамі, маюць зносіны, абмяркоўваюць навіны, звязаныя з будаўніцтвам прадпрыемства, кормяць галубоў.