Самалёт з перуанскімі заўзятарамі задыміўся на падлёце да Цюмені

Пасажыры за 20 хвілін да прызямлення пачулі выбух.

Самалёт авіякампаніі Utair з футбольнымі фанатамі нацыянальнай каманды Перу, якія вярталіся з Екацярынбурга ў Маскву праз Цюмень, задыміўся перад пасадкай у аэрапорце. Пра гэта паведамляе РБК са спасылкай на перуанскі тэлеканал RPP.

Пасажыры за 20 хвілін да прызямлення ў Цюмені пачулі выбух, праз некаторы час у салон паветранага судна стаў пранікаць дым - у самалёта загарэлася турбіна. Са слоў прысутных у салоне, экіпаж не размаўляў ні па-ангельску, ні па-гішпанску, бортправаднікі нічога не патлумачылі пра здарэнне.

«Яны проста спыніліся, каб папрасіць нас прышпіліць свае рамяні перад пасадкай», - прыводзіць тэлеканал словы аднаго з перуанскіх пасажыраў самалёта UT106 злучэннем Екацерынбург - Цюмень.

Іншы пасажыр падкрэсліў, што падчас задымлення не былі адкінутыя кіслародныя маскі, толькі два бортправаднікі хадзілі з боку ў бок.

У прэс-службе авіявозніка РБК пацвердзілі, што ў працы аднаго з рухавікоў самалёта, які выконваў рэйс UT106 Екацерынбург - Цюмень, «адбыліся непаладкі».

«Па сістэме кандыцыянавання ў салон кароткачасова паспеў паступіць дым, затым сістэма ачысціла паветра», - заявілі ў Utair.

Разам з гэтым кампанія зняпраўдзіла інфармацыю аб пажары на борце. «Экіпаж дзейнічаў паводле інструкцыі і пасадзіў самалёт у штатным рэжыме. Самалёт самастойна заруліў на стаянку, пасажыры выйшлі па трапе без выкарыстання аварыйных прыстасаванняў», - растлумачылі ў возніка, дадаўшы, што маюць намер разам з авіяцыйнымі ўладамі правесці расследаванне інцыдэнту. Няспрпаўны рухавік правераць на прадмет трапляння старонняга аб'екта пры зніжэнні.