Беларускі банк паспрабуе купіць «дачку» расейскага Ашчадбанка ва Украіне

Раней Нацбанк Украіны адмовіўся ўхваліць першую прапанову беларускага банка.

Беларускі Парытэтбанк, падкантрольны ўпраўленню справамі дыктатара Беларусі, другім разам падаў заяўку на куплю «дачкі» расейскага Ашчадбанка ва Украіне. У паведамленні прэс-службы беларускага банка гаворыцца, што пакет неабходных дакументаў ужо ўнесены ў Нацыянальны банк Украіны (НБУ), які ў сакавіку 2018 года адмовіўся ўхваліць першую прапанову ўгоды, паведамляе РБК.

«У нас было дастаткова часу, каб уважліва вывучыць патрабаванні рэгулятара Украіны і належным чынам падрыхтавацца да ўдзелу ў пагадненні», - пракаментаваў другую спробу кіраўнік праўлення Парытэтбанка Сяргей Бялоў.

Пастанову пра другі тур перамоў з Нацбанкам Украіны Бялоў назваў лагічным працягам інвестыцыйнай стратэгіі развіцця Парытэтбанка, адзначыўшы высокі патэнцыял актываў украінскай «дачкі» Ашчадбанка.

«У выпадку прыняцця станоўчай пастановы Нацыянальным банкам Украіны мы гатовыя да інтэнсіўнага развіцця на ўнутраным і замежных рынках» - запэўніў Бялоў.

У паведамленні Парытэтбанка адзначаецца, што фінансавыя ўмовы пададзенай заяўкі будуць апублікаваныя ў рамках рэгулярнай міжнароднай фінансавай справаздачнасці банка ў выпадку адабрэння заяўкі Нацбанкам Украіны.

У сакавіку 2018 года СМІ называлі Парытэтбанк адзіным прэтэндэнтам на набыццё ўкраінскай «дачкі» Ашчадбанка. Аднак НБУ адмовіўся ўзгадніць угоду, спаслаўшыся на «неадпаведнасць заяўніка патрабаванням заканадаўства Украіны».

У сярэдзіне сакавіка 2017 года ўказам прэзідэнта Украіны Пятра Парашэнкі былі ўведзеныя санкцыі ў дачыненні да пяці ўкраінскіх «дачок» расейскіх банкаў - VS Bank, Ашчадбанка Украіны, ВТБ, БМ Банка і Прамінвестбанка. 6 сакавіка 2018 года санкцыі былі падоўжаныя яшчэ на год.

За апошнія 12 месяцаў з ліку расейскіх «дачок», якія ўнёс у свой указ Парашэнка, уладальніка змяніў толькі VS Bank, які Ашчадбанк прадаў групе ТАС Сяргея Цігіпкі. Кіраўнік ВТБ Андрэй Косцін летась у верасні паведаміў, што ў яго былі два патэнцыйныя пакупнікі VTB Bank, аднак яны не атрымалі дазволу на ўгоду ад НБУ.