У Беларусі з'явіцца больш за сотню пунктаў прыёму старой бытавой тэхнікі

За кілаграм «жалеза» даюць 25 капеек.

Пазбавіцца ад непрацоўнага тэлевізара ці зламанай лядоўні стане прасцей, у Беларусі стане больш пунктаў прыёму такой тэхнікі, паведамляе kp.by.

- Ёсць дзве задачы: уключэнне ў абарот другасных рэсурсаў і захаванне навакольнага асяроддзя, - тлумачыць намеснік гендырэктара холдынгу «Белрэсурсы» Гадад Галімаў. - Раней прыёмам бытавой тэхнікі, што выйшла з абароту, займалася толькі прадпрыемства БелВТІ. Але яно не мела разгалінаванай сеткі, толькі падраздзяленні ў абласных цэнтрах і гарадах. Цяпер да працы падключыліся прадпрыемствы Белкаапсаюз і «Белрэсурсы».

Гэтыя прадпрыемствы заключаюць дамову з БелВТІ на прыём бытавой тэхнікі.

- Было наважана не ствараць свае пункты прыёму, а скарыстацца пунктамі збору нашых партнёраў, - тлумачыць начальніца экалагічнага сектара прадпрыемства БелВТІ Дар'я Капціліна. - Белкаапсаюз і «Белрэсурсы» і гэтак займаюцца зборам матэрыялаў, напрыклад паперы, пластыка. Цяпер у іх пералік увойдзе электронная і электрычная неразборная тэхніка. Мы ўжо ўклалі дамову на адкрыццё больш за 100 пунктаў прыёму тэхнікі. У нашага прадпрыемства іх было ўсяго 11.

Асаблівая ўвага будзе да сельскай мясцовасці. Калі гараджане часцяком пакідаюць непатрэбную тэхніку каля пад'езда і яе забіраюць, то ў вёсках адвозяць на сметнік ці ў лес, а гэта сур'ёзны ўдар па экалогіі.

- У сельскай мясцовасці не было арганізаванай сеткі прыёму такіх матэрыялаў, з 1 чэрвеня яны з'явіліся, - кажа Гадад Галімаў. - Да прыкладу, Белкаапсаюз будзе займацца прыёмам тэхнікі ў сельскай мясцовасці. Падраздзяленні нашага холдынгу прымаюць тэхніку ў абласных цэнтрах і гарадах, працуе 32 пункты. За тры тыдні сабралі ўжо 1 тону 200 кг.

У пункты прыёму Белкаапсаюза і «Белрэсурсы» давядзецца дастаўляць тэхніку самім, затое за яе заплацяць: 25 капеек за кілаграм у неразабраным выглядзе (у БелВТІ за кілаграм любой бытавой тэхнікі даюць 20 капеек, а за лядоўню, пральныя машыны і пліты - 25 капеек).

Але ў БелВТІ ёсць і спецыяльная паслуга - бясплатны вываз непатрэбных лядоўняў, тэлевізараў або пралак. Спецыялісты прыедуць да вас дадому і забяруць іх, але ёсць і ўмова - грошай за здадзеную тэхніку вы не атрымаеце.

Пазбаўляемся ад старога тэлевізара, чыстая выгада - паўтара рубля

Няхай, мы здаём стары тэлевізар вагой блізу 25 кг, за яго можна атрымаць 5 рублёў (гэта калі здаваць яго ў пунтах прыёму БелВТІ). Нядрэнна, але ж у пункт прыёму яго трэба яшчэ даставіць! Наўрад атрымаецца на аўтобусе ці метро. Калі аўто няма, застаецца таксі. На сайце БелВТІ - блізу 40 пунктаў прыёму тэхнікі ў Менску. Да прыкладу, наш дом на вуліцы Карбышава, найбліжэйшы пункт - на Славінскага. Паездка на недарагім таксі абыдзецца ў 3,5 рубля. У выніку прыбытак ад старэнькага тэлевізара - паўтара рубля.

А каб непатрэбную тэхніку вывезлі ад вас (бясплатна, але і за здадзеную «сыравіну» не заплацяць), трэба пакінуць заяўку ў БелВТІ, на сайце або тэлефоне. Работнікі прыедуць на працягу 3 - 5 дзён.