«Калі яны людзей лячылі, калі такія хабарнікі?»

Віцебскія медыкі – пра затрыманне галоўнага лекара абласной лякарні.

Паводле падазрэння ў хабары затрыманы галоўны лекар Віцебскай абласной клінічнай лякарні Анатоль Аладзька. У дачыненні да медыка распачатая крымінальная справа. Паводле звестак КДБ, ён з'яўляецца адным з 60 фігурантаў крымінальнай справы аб карупцыі ў беларускай ахове здароўя.

Віцебскія лекары: «Даведаліся пра затрыманне Аладзькі на мінулым тыдні»

Ад размовы пра затрыманне галоўнага лекара Анатоля Аладзькі лекары з розных прычынаў сыходзяць. Але на ўмовах ананімнасці некалькі супрацоўнікаў лякарні ўсё ж пагадзіліся пагутарыць з TUT.BY.

– Пра тое, што Анатоля Анатольевіча затрымалі, мы даведаліся на мінулым тыдні. У лякарні хадзілі розныя чуткі... Але вінаваты ён у чым-небудзь ці не, я не ведаю. Мы людзі маленькія... Свайго лекара далёка не кожны дзень бачым.

– Я не веру, што Аладзька ўблытаны ў нейкія фінансавыя махінацыі. Гэта прафесійны лекар, добры чалавек. Думаю, ва ўсім разбяруцца і яго адпусцяць.

– Ну затрымалі і затрымалі... Нічога надта страшнага ў гэтым няма. Як затрымалі – так і адпусціць могуць. Колькі ўжо такіх выпадкаў было, калі кіраўнікоў у нечым падазравалі, а потым разбіраліся ў сутнасці. Вернецца чалавек на працу, і ўсё пойдзе па-ранейшаму. Мы і так, як бачыце, ходзім на працу, лечым людзей, працоўны працэс не спыніўся.

– Аладзька трапіў пад нейкі агульны каток «зачысткі». Кожны дзень сачу ў інтэрнэце за навінамі пра гучныя затрыманні медыкаў. Гэтую «зачыстку» ўжо празвалі «справаю лекараў», як у 1937 годзе. Гэта недарэчна і страшна. І ўвогуле не ўкладаецца ў галаве: няўжо ў беларускай медыцыне ўсе пагалоўна зладзеі, карупцыянеры, злачынцы? Паўстае пытанне: як тады яны ўвесь гэты час, да затрыманняў, лячылі і ратавалі людзей, пісалі навуковыя працы, укаранялі інавацыі ў медыцыне? І ўвогуле насілі белыя халаты?.. Калі ім было ўсім гэтым займацца, калі яны такія страшныя хабарнікі?

У адным з мінулых інтэрв'ю TUT.BY Анатоль Аладзька адзначыў, што прафесія лекара патрабуе не толькі ведаў і досведу, але і духоўнасці:

– Тут свае складанасці: начныя дзяжурствы, вялікія фізічныя і маральныя нагрузкі, многія службы ў нас працуюць кругласутачна, да нас вязуць цяжкіх хворых... Гэта патрабуе ад супрацоўнікаў прафесіяналізму і высокіх маральных якасцяў.

У «справе медыкаў» ужо больш за 60 фігурантаў

КДБ затрымаў, заключыў пад варту, а таксама скарыстаў іншыя захады стрымання ў дачыненні да 37 службовых асобаў, а ўсяго ў крымінальнай справе ў дачыненні да супрацоўнікаў аховы здароўя – больш за 60 фігурантаў.

«Усе яны шматкроць атрымлівалі незаконныя грашовыя ўзнагароды за спрыянне ў пастаўках медабсталявання і медыцынскіх прэпаратаў паводле завышаных коштаў, што пацвярджаецца вынікамі праведзеных доўгі час аператыўна-вышуковых мерапрыемстваў, паказаннямі сведкаў і саміх абвінавачаных, а таксама вынікамі ператрусаў і выманняў», – паведаміў журналістам 11 ліпеня старшыня КДБ Валерый Вакульчык.

Галоўны лекар ВАКБ – «дэпутат» аблсавету

Анатолю Аладзьку – 53 гады. У 1987 годзе ён скончыў Віцебскі медінстытут паводле спецыяльнасці «лячэбная справа». Быў інтэрнам у абласной клінічнай лякарні, потым выкладаў у Магілёўскім медвучылішча. З 1989 года Аладзька працаваў хірургам у віцебскай паліклініцы імя Калініна. У 1991-м перайшоў у абласную клінічную лякарню.

У 2000 годзе Анатоль Аладзька стаў галоўным урачом спецдыспансера Віцебскага філіяла навукова-даследчага клінічнага Інстытута радыяцыйнай медыцыны і эндакрыналогіі. У 2002-м закончыў навучанне ў клінічнай ардынатуры Віцебскага медуніверсітэта паводле спецыяльнасці «хірургія», а праз год стаў галоўным лекарам яго клінікі.

Абласной клінічнай лякарняй Аладзька кіруе 8 гадоў, з 2010 года.

У 2014 і 2018 гадах Анатоля Аладзьку абіралі ў аблсавет «дэпутатаў». На апошніх выбарах ён задэклараваў прыбытак за 2016 год на суму амаль 92,9 тысячы рублёў, з іх 62 тысячы рублёў атрымаў ад продажу кватэры, паведамляюць «Народныя навіны Віцебска».