Адпачынак па-беларуску: самыя папулярныя кірункі

Турцыя і Балгарыя – лідары ў папулярнасці.

«Салідарнасць» распытала эксперта ў сферы турызму Лілію Кобзік пра турыстычныя вынікі першай паловы лета.

Пра складанасці сезону

– Для арганізаванага турызму гэтае лета выдалася не вельмі простым. З аднаго боку, уплывае гэтая скандальная сітуацыя (гісторыя вакол кампаніі «Наталі Турс»). З іншага, рынак самастойнага турызму моцна зваблівае кліентаў ад пакетных тураў. Вядома, нельга сказаць, што ўсе раптам пераключыліся на вылеты лоўкост. Але такая тэндэнцыя ёсць, – дзеліцца Лілія Кобзік.

Паводле словаў суразмоўцы, у пачатку лета на піку папулярнасці ў беларусаў былі вылеты на курорты з Кіева. Праўда, складанасці з вылетам дзвюх украінскіх авіякампаній крыху пагоршылі рэпутацыю гэтага кірунку.

– Думаю, гэта такое супадзенне абставінаў, праз якое чартарныя рэйсы з Менска загружаныя не так, як гэтага хацелася б і як было запланавана, – падкрэсліла суразмоўца.

Турцыя і Балгарыя – лідары ў папулярнасці

Якія кірункі ў пачатку лета былі самымі папулярнымі ў беларусаў?

Турцыя паказвае добрыя вынікі, Балгарыя папулярная. І тая ж Грэцыя, асабліва Крыт, на які ў нас былі гарачыя і вельмі танныя прапановы, – апавяла Лілія Кобзік. – Турыстычны рынак стаў вельмі разнастайны: хтосьці ляціць лоўкост, хтосьці – рэгулярнымі рэйсамі, з суседніх краінаў. Кожны год дадае ў аб'ёме мясцовы рынак вылетаў.

Багацейшымі не сталі

На думку эксперта, нельга сказаць, што беларусы сталі менш ездзіць адпачываць, хоць грошай у іх, відавочна, не дадалося:

– Так, мы бачым, што росту заробкаў не адбылося, беларусы не сталі багацейшымі. Але і ездзіць адпачываць яны не перасталі. Проста з'явілася больш прапановаў з боку турфірмаў. Некаторыя кірункі, магчыма, і аселі сёлета, але ў гэтага могуць быць аб'ектыўныя прычыны:

– Нашы людзі пачалі выкарыстоўваць значна больш кірункаў. Акрамя таго, Турцыя сёлета прадэманстравала саракаадсоткавы рост і, магчыма, звабіла на сябе частку адпачывальнікаў.

Пятніца 13-га

Часам на настроі кліентаў турфірмаў уплывае дата ў календары:

– Аператары скардзяцца, што некаторыя даты асабліва моцна падгараюць. Напрыклад, адзін дзень гарыць, а другі перапоўнены заяўкамі. Вось і цяпер была пятніца 13-га, і ў тую ж Чарнагорыю ды іншыя курортныя краіны ў гэты дзень людзі туры не бяруць. А ў сезон кожны дзень мае значэнне.