Археолагі выявілі ў Карэліцкім раёне рэшткі замка ВКЛ

Археолагі сантыметр за сантыметрам адкрываюць элементы ўмацаванняў старадаўняга сельскага замка ў Беразаўцы.

Высветлілася, падмуркі абарончых збудаванняў драўляных замкаў у XVI стагоддзі рабілі не з дрэва, як меркавалася, а з валуноў, паведамляе АНТ.

Пра шыкоўныя рэзідэнцыі беларускіх магнатаў вядома шмат. А вось як жыла знаць на вёсцы, звестак досыць мала. Драўлянай архітэктуры часоў ВКЛ у краіне амаль не захавалася. Любая інфармацыя пра побыт той эпохі на вагу золата. А ўжо тая, што на ўзроўні падлогі і склепа – асабліва. Мяркуючы з колькасці чарапкоў посуду і разнастайнасці костак, у ежы жыхары замка ў Беразаўцы сабе не адмаўлялі.

З боку замак – гэта парослы зелянінай узгорак пасярод поля, але ў XVI стагоддзі тут віравала жыццё. Сям'я Кмітаў атрымала зямлю ў падарунак ад вялікага князя і пабудавала рэзідэнцыю. 95 на 60 метраў – буйны ў тыя часы двор, шмат прыслугі і набліжаных. Тут было ўсё для жыцця: панскі дом, памяшканні для прыслугі, гаспадарчыя пабудовы і нават свая царква. У XVI стагоддзі трапіць у замак можна было па мосце. Засталіся ямы для яго апораў. А наперадзе і сама вежа – 30 квадратных метраў – сярэдні памер.

На поўнае даследаванне замкавага комплексу сыдзе не адзін дзясятак гадоў. Аднак паглядзець, як маглі выглядаць валодання Кмітаў, можна будзе ўжо налета. Навукоўцы рыхтуюць 3D-мадэль аб'екта і мараць, што ў будучыні гэтае месца стане не менш папулярным у турыстаў, чым размешчаны непадалёк Мірскі замак.