Суд у Грэцыі ўхваліў выдачу Францыі расейскага кіберзлачынцы
8- 14.07.2018, 12:23
- 10,236
Масква абураецца.
Суд у Грэцыі ўхваліў запыт Францыі пра выдачу падазраванага ў кіберзлачынствах расейца, якога таксама шукаюць ЗША і сама Расея, Масква прыстрашыла захадамі ў адказ.
Пра гэта паведамляе ўкраінская служба "Радыё Свабода".
Суд у горадзе Салонікі пастанавіў 13 ліпеня выдаць менавіта Францыі падазраванага ў махлярстве з біткойнамі 38-гадовага Аляксандра Вінніка, якога арыштавалі ў Грэцыі летась паводле ордара, выдадзенага ЗША.
У Францыі Вінніка абвінавачваюць у кіберзлачынствах, адмыванні грошай, удзеле ў злачыннай арганізацыі і вымагальніцтве.
Пасля пастановы суда ў Расеі прыгразілі неўдакладненымі захадамі. Успомніўшы пра "несяброўскую" пастанову Афінаў некалькі дзён таму выправадзіць некалькіх расейскіх дыпламатаў і забараніць уезд некалькім іншым, у Міністэрстве замежных справаў Расеі заявілі, што пастановай пра Вінніка "грэцкія ўлады прадаўжаюць пагаршаць сітуацыю" ў двухбаковых стасунках. "Відавочна, што такія дзеянні не могуць ігнаравацца расейскім бокам", – гаворыцца ў заяве.
Раней Вярхоўны суд Грэцыі ўжо ўхваліў быў выдачу Вінніка ў ЗША – там яго абвінавачваюць у адмыванні мільярдаў даляраў дзякуючы выкарыстанню біткойнаў.
Канчатковую пастанову павінен прыняць міністр юстыцыі Грэцыі, вывучыўшы ўсе тры запыты пра экстрадыцыю – з Францыі, ЗША і Расеі.
Сам Віннік адхіляе ўсе абвінавачванні ў незаконных дзеяннях. Ён застаецца пад вартай у Грэцыі, пакуль не будзе канчатковай пастановы пра яго экстрадыцыю.