Павел Севярынец: Мы пачнём шырокую кампанію байкоту рэстарацыі ля Курапатаў

Палітык абвясціў ультыматум уладальнікам скандальнай рэстарацыі.

Абаронцы Курапатаў гатовыя распачаць шырокую кампанію байкоту рэстарацыі «Паедзем паядзім».

Пра гэта сустаршыня аргкамітэту партыі БХД Павал Севярынец заявіў у жывым эфіры «Еўрарадыё».

З ягоных слоў, калі ў сераду ўладальнікі рэстарацыі «Паедзем паядзім» не дадуць адказу, то пачнецца байкот не толькі гэтай рэстарацыі, але і іншых устаноў гэтых самых уладальнікаў. Між іншым, наступным аб'ектам Севярынец назваў рэстарацыю «Гранд Кушавель». Таксама плануецца зладзіць байкот пастаўшчыкоў у гэтыя ўстановы.

Акрамя таго, абаронцы Курапатаў прапануюць не выдаваць шэнгенскія візы тым, хто мае дачыненне да гэтага скандалу.

У суботу Севярынец абвясціў ультыматум уладальнікам рэстарацыі «Паедзем паядзім»: ён даў ім тры дні на тое, каб згарнуць працу ўстановы.