Намеснікам начальніка Генштаба Канады прызначаны этнічны ўкраінец
- 17.07.2018, 9:46
- 7,346
Міністр абароны адзначыў непахісную прыхільнасць генерал-лейтэнанта Пола Вінніка сваім жаўнерам і Канадзе.
Намеснікам начальніка Генеральнага штаба абароны Канады прызначаны этнічны ўкраінец, генерал-лейтэнант канадскага войска Пол Віннік.
Пра гэта 16 ліпеня паведамілі ў прэс-службе Міністэрства абароны Канады.
Цягам апошніх двух гадоў Віннік камандаваў наземнымі войскамі. Цяпер іх узначаліў генерал-лейтэнант Жан-Марк Ланцье.
Таксама Віннік узначальваў вайсковую выведку краіны. Цырымонія ўступлення на пасаду Ланцье прайшла на Парламенцкім узгорку ў Атаве.
На ёй прысутнічаў кіраўнік Генштаба Канады Джонатан Вэнс.
«Я хацеў бы павіншаваць генерал-лейтэнанта Вінніка з ягонай новай роляй і падзякаваць за ягоную прыхільнасць і моцнае кіраўніцтва канадскім войскам цягам апошніх двух гадоў», - цытуе прэс-служба мінабароны Вэнса.
«Пад кіраўніцтвам генерал-лейтэнанта Вінніка канадскае войска было гатовае абараняць інтарэсы канадцаў у краіне і за мяжой. Я ўхваляю ягоную непахісную прыхільнасць сваім жаўнерам і Канадзе», - падкрэсліў міністр абароны Канады Харджыт Саджан.
Агенцтва «Укрінфарм» адзначае, што ў апошнія гады Віннік некалькі разоў прыязджаў ва Украіну, пабываўшы, напрыклад, у вёсцы Паздзіміры ў Львоўскай вобласці, адкуль родам ягоныя продкі.