Мінабароны Беларусі раскрыла падрабязнасці пра «кібер-роту»

Навошта праграмістаў забіраюць у войска?

Мінабароны на сваім афіцыйным сайце раскрыла падрабязнасці пра стварэнне ў Беларусі роты інфармацыйных тэхналогій. Яна з'явіцца ва Узброеных сілах краіны ўжо ў канцы гэтага года.

Напрыклад, паведамляецца, што «падраздзяленне будзе ўкамплектаванае вайскоўцамі тэрміновай вайсковай службы з ліку грамадзян, якія дабіліся найбольшых поспехаў у галіне інфармацыйных тэхналогій, як правіла, маюць вышэйшую прафесійную адукацыю ў спецыяльнасцях, якія цікавяць Міністэрства абароны, і выявілі жаданне праходзіць вайсковую службу ў гэтай роце».

Мінабароны абяцае, што кожнаму спецыялісту роты інфармацыйных тэхналогій будзе вызначаны навуковы кіраўнік «для таго, каб не страціць атрыманую кваліфікацыю. У інтарэсах вайсковага міністэрства вайскоўцы будуць выконваць канкрэтныя навукова-прыкладныя задачы, а таксама прадоўжаць свой удзел ва ўжо распачатых навуковых праграмах».

На сайце міністэрства сцвярджаецца, што «цяпер распрацоўваецца адпаведная нарматыўна-прававая дакументацыя, праводзіцца комплекс мерапрыемстваў для абсталявання спецыяльных працоўных месцаў, ствараюцца ўсе неабходныя ўмовы для працы».

Акрамя таго, рэсурс dev.by апублікаваў «Агульны пералік кампетэнцый супрацоўнікаў і кірункаў для праектаў», дзе пазначаны патрабаванні да набору праграмістаў. Вайсковаму міністэрству неабходныя спецыялісты ў галіне ўбудавальных развязанняў, кампутарнага зроку (OpenCV), праектавання і стварэння баз звестак, стварэння мабільных дастасаванняў пад Android, iOS, Web-праграмавання, вёрсткі і тэставання ПА.

Мінабароны не раскрывае, чым менавіта будуць займацца спецыялісты ў ІТ-роце - «праз закрытасць інфармацыі няма магчымасці даць больш падрабязнае апісанне задач», аднак вызначаюць тры агульныя кірункі-праекты - «Стварэнне ўбудавальных развязанняў»,« Стварэнне і суправаджэнне баз звестак, а таксама аналітычных інструментаў для іх» і «Стварэнне дастасаванняў для мабільных прылад».