У ліпені новыя рахункі атрымаюць жыхары ўсіх рэгіёнаў

Рахункі з QR-кодам у правым верхнім куце атрымаюць усе беларусы.

Пра гэта паведамілі ў АРІП. Нагадаем, аплаціць ЖКП з дапамогай кода, у якім закладзеная інфармацыя аб асабовым рахунку, можна праз мабільны банкаўскі дадатак або на пошце, піша tut.by.

У АРІП адзначылі, што цяпер магчымасць аплаты з дапамогай QR-кода надае сваім кліентам Белінвестбанк і БТА-Банк, а таксама часткова Альфа Банк. Іншыя банкі таксама разглядаюць магчымасць адпаведнай дапрацоўкі сваіх мабільных дастасаванняў.

У АРІП адзначаюць, што ўжо ліквідавалі праблемы, якія былі пры аплаце рахункаў з QR-кодам.

Для аплаты камунальных паслуг, запусціўшы мабільнае банкаўскае дастасаванне, трэба паднесці камеру тэлефона да QR-кода на невялікую адлегласць, але не ўшчыльную. Счытванне і расшыфроўка адбудуцца аўтаматычна. Пасля гэтага на экране з'явіцца асабісты рахунак, палі для ўводу паказанняў прыбораў уліку вады. Затым, выконваючы загады, застанецца націснуць на віртуальную клавішу «Аплаціць», і аплата будзе здзейсненая.

Як тлумачыла раней дарадца старшыні праўлення АРІП Ульяна Захарава, гэта навіна не з'яўляецца рэвалюцыйнай зменай звыклых спосабаў аплаты. Яна толькі паскарае гэты працэс.

«Скарачаецца колькасць крокаў. Гэты метад будзе асабліва зручным для новых карыстальнікаў прыкладанняў пры здзяйсненні першых аплат або для тых, хто аплачвае камунальныя паслугі, напрыклад, за сваякоў. Цяпер не трэба будзе шукаць паслугу ў дрэве АРІП і ўводзіць лічбы асабовага рахунку, дастаткова проста адсканаваць код. Спадзяемся, што неўзабаве ўсе карыстальнікі мабільнага банкінгу змогуць скарыстацца гэтай тэхналогіяй», - сказала яна.

З чэрвеня магчымасць аплаты камунальных паслуг па QR-коду пададуць і некаторыя паштовыя аддзяленні Менску.