Мядзведзеў: ЗША абвясцілі нам эканамічную вайну

У Вашынгтоне агучана адразу некалькі антыпуцінскіх санкцыйных ініцыятыў.

Прэм'ер-міністр Расеі Дзмітрый Мядзведзеў мяркуе, што ў выпадку ўвядзення новых антырасейскіх санкцый з боку ЗША гэты крок можна будзе расцэньваць як абвяшчэнне эканамічнай вайны. Адпаведную заяву кіраўнік урада зрабіў у пятніцу, на сустрэчы з супрацоўнікамі Кронацкага дзяржаўнага запаведніка ў Камчацкім краі, піша РБК.

Адказваючы на пытанне аднаго з супрацоўнікаў пра новыя санкцыі, прэм'ер заўважыў, што не хацеў бы каментаваць размовы пра іх. «Але магу сказаць адно: калі будзе нешта накшталт забароны дзейнасці банкаў або выкарыстання той ці іншай валюты, то гэта можна будзе назваць зусім проста: гэта абвяшчэнне эканамічнай вайны», - сказаў ён (цытата з ТАСС).

«І на гэтую вайну трэба будзе рэагаваць - эканамічнымі метадамі, палітычнымі метадамі, а ў выпадку неабходнасці і іншымі метадамі. І нашы амерыканскія сябры гэта павінны разумець», - дадаў Мядзведзеў.

За апошні час у Вашынгтоне было агучана адразу некалькі антырасейскіх санкцыйных ініцыятыў. 3 жніўня амерыканскія сэнатары ўнеслі ў кангрэс законапраект «Акт аб абароне амерыканскай бяспекі ад агрэсіі Крамля 2018» (DASKAA), які зводзіць у адну базу ўжо дзейныя ў дачыненні да Расеі санкцыі і прапануе новыя захады.

Дакумент мае на ўвазе забарону на аперацыі расейскім дзяржбанкам у ЗША, а таксама абмежаванне магчымасці куплі АФЗ. Рубель на фоне гэтых паведамленняў апусціўся да двухгадовага мінімуму, інвестары пачалі прадаваць паперы дзяржбанкаў і дзяржаблігацыі.

Акрамя таго, 8 жнiўня Дзярждэп паведаміў аб планах ўвесці санкцыі праз атручванне былога супрацоўніка ГРУ Сяргея Скрыпаля і ягонай дачкі Юліі ў Солсбэры.

Санкцыі маюць на ўвазе забарону паставак у Расею амерыканскіх тавараў, звязаных з нацыянальнай бяспекай, у тым ліку электронікі падвойнага прызначэння. У выпадку, калі расейская старана не дасць гарантый адмовы ад выкарыстання хімічнай зброі і не пагодзіцца на допуск міжнародных інспектараў, Вашынгтон прывядзе ў дзеянне дадатковы пакет захадаў: можа панізіць узровень дыпламатычных кантактаў, забараніць авіякампаніі «Аэрафлот» лятаць у ЗША, а таксама скараціць да мінімуму ўзаемны гандаль і перашкаджаць Расеі ў атрыманні міжнародных банкаўскіх крэдытаў.