Паўлюк Быкоўскі: Цяпер пра «Немецкую волну» ведаюць канваіры беларускіх турмаў
3- 10.08.2018, 20:58
- 18,212
Журналіст, які выйшаў на волю распавёў, як праводзіў лікбез у ІЧУ.
10 жніўня пасля допыту ў следчым камітэце Беларусі вызвалілі карэспандэнта Deutsche Welle ў Менску Паўлюка Быкоўскага, паведамляе «Радыё Свабода».
Паўлюк Быкоўскі быў затрыманы 8 жніўня на 72 гадзіны. Гэты тэрмін сканчаўся ў суботу, 11 жніўня. Перад гэтым у яго кватэры быў праведзены ператрус з канфіскацыяй электронных носьбітаў інфармацыі. Deutsche Welle звярнулася да беларускага амбасадара ў Бэрліне з патрабаваннем неадкладна вызваліць Быкоўскага:
- На ўмовы ўтрымання я жаліцца не магу - гэта звычайныя ўмовы для ІЧУ.
Гэта не першы досвед траплення беларускага журналіста ў следчы ізалятар, да мяне многія журналісты там сядзелі. Я бачу, што мяне сустрэлі на волі журналісты - гэта добра і вельмі прыемна. Думаю, што салідарнасць журналістаў - гэта вельмі важная рэч. Мне казалі, у тым ліку канваіры, што адбываецца. Для «Немецкой волны», дзе я працую, адбылося павелічэнне кола людзей, якія пра яе ведаюць. Сёння пра «Немецкую волну» ведаюць канваіры і зняволеныя, - распавёў Паўлюк Быкоўскі.
На арышт журналістаў і ператрусы ў рэдаккцыях tut.by і БелаПАН рушыла ўслед аператыўная і жорсткая міжнародная рэакцыя.
З патрабаваннем вызваліць журналістаў выступіла Рада Еўропы, «Рэпарцёры без межаў». Еўразвяз таксама заклікаў вызваліць журналістаў. З заявамі таксама выступілі МЗС Нямеччыны, фракцыя ХДС/ХСС у Бундэстагу, амбасада ЗША ў Беларусі і некаторыя іншыя еўрапейскія дыпламаты.
Сустаршыня Хельсінкскай камісіі ЗША, кангрэсмэн Крыстафэр Сміт заявіў, што амерыканскі ўрад павінны зрабіць абарону патрыётаў і журналістаў Беларусі галоўным прыярытэтам у стасунках з Лукашэнкам.
8 жніўня рэдакцыі tut.by і БелаПАН наведалі дыпламаты з ЗША і Еўразвязу.
Раней таксама з'явілася інфармацыя, што калі журналісты не будуць вызваленыя, то ў рэжыму Лукашэнкі могуць адабраць права на правядзенне Еўрапейскіх гульняў.