Працоўны з Магілёва: Завод пераводзяць на 1-гадзінны працоўны дзень

Не згодных звальняюць.

На магілёўскім заводзе «Строммашына» работнікаў пераводзяць на 1-гадзінны працоўны дзень. Адпаведнае апавяшчэнне на днях яны атрымалі з аддзела кадраў. Фатаграфію бланка «аб змене істотных умоў працы» адзін з працаўнікоў прадпрыемства размясціў у інтэрнэце, піша «Салідарнасць».

Напрыклад, у дакуменце сказана, што з гэтага часу рэжым працы на прадпрыемстве будзе з 7.00 да 8.00, а аплата – адпаведна з «прапарцыйна адпрацаваным часам».

Такія захады ўжытыя «з прычыны нізкай эфектыўнасці вытворчасці, цяжкага эканамічнага становішча», «памяншэння аб'ёму работ з мэтай аптымізацыі вытворчага цыклу» і на падставе загаду «Аб аптымізацыі колькасці работнікаў».

У паведамленні таксама сказана, што ў выпадку адмовы прадоўжыць працу ў новых умовах работнiкаў чакае звальненне.

«Уласна, прыносяць вам на подпіс загад, у якім вам паведамляюць, што з такога чысла вас пераводзяць на 1-гадзінны працоўны дзень, а заробак вам будуць налічваць па фактычна адпрацаванаму часу і на падставе таго, як вы будзеце спраўляцца з абавязкамі, - каментуе сітуацыю работнік прадпрыемства. - Калі не згодныя, то вас звальняюць паводле адпаведнага пункта працоўнага кодэкса, (праз адмову працаваць). А паводле аб'ектыўных прычын вы не зможаце выконваць свае абавязкі за названы прамежак працоўнага часу па азначэнні. Гэта значыць, на паперах атрымліваецца тое, што гэта вы дрэнны работнік, і яны па дабрыні душэўнай вам двухтыднёвую дапамогу выплачваюць, даўшы вам штурхяля!»

Прадпрыемства: «У нас не ўсе на 0,1 стаўкі працуюць. Ёсць і тыя, хто на 0,25 і нават 0,5»

У аддзеле кадраў «Салідарнасці» пацвердзілі, што рассылалі такія паведамленні.

- Гэта звязанае з нізкім аб'ёмам вытворчасці і няпоўнай загружанасцю магутнасцяў, - адзначыла ў каментары начальніца аддзела кадраў. - У нас ёсць работнікі, не занятыя цэлы дзень, і начальства прыняло пастанову аптымізаваць вытворчасць. Але гэта часовы захад. На верасень у нас ужо намечаны новыя кантракты і мы разлічваем, што сітуацыя зменіцца.

На прадпрыемстве запэўніваюць, што не ўсіх работнікаў перавялі на аднагадзінны працоўны дзень.

- У нас не толькі на 0,1 стаўкі працуюць. Ёсць і тыя, хто на 0,25 і нават 0,5, - запэўніваюць у аддзеле кадраў. - У асноўным, на 1-гадзінны працоўны дзень перавялі пенсіянераў, у якіх заканчваецца кантракт.

На пытанне «Салідарнасці», колькі такіх, там адзначылі «23 з 31».

- Паколькі гэта пенсіянеры, то не думаю, што людзі моцна пацярпяць, - мяркуюць у аддзеле кадраў.

Адзначым, што завод «Строммашына» ўжо даўно стаў галаўным болем уладаў, якія ўсімі сіламі спрабавалі выратаваць прадпрыемства. Аднак страты і неплатаздольнасць там мелі ўстойлівы характар. У 2015 годзе эканамічны суд Магілёўскай вобласці прызнаў прадпрыемства банкрутам. На той момант агульная сума запазычанасці складала 154 млрд 958 млн недэнамінаваных рублёў - больш за палову кошту ўсёй маёмасці завода.

У чэрвені 2018 года эканамічны суд Магілёўскай вобласці аштрафаваў ужо былога антыкрызіснага кіраўніка завода «Строммашына» Дзмітрыя Барэйку на 294 рублі. Ён са спазненнем (ад некалькіх дзён да месяца) падваў справаздачы аб сваёй дзейнасці. Сваю віну Барэйка прызнаў і «чыстасардэчна раскаяўся». Цяпер на прадпрыемстве іншы антыкрызісны кіраўнік Сяргей Грынкевіч - раней ён быў антыкрызісным кіраўнікам Магілёўскай швейнай фірмы «Вяснянка».