ЗША падвойваюць колькасць марскіх пяхотнікаў у Нарвегіі і перакідваюць сілы да мяжы РФ
8- 15.08.2018, 16:29
- 12,075
Урад у Осла занепакоены Расеяй з моманту анэксіі Крыму.
Злучаныя Штаты больш чым удвая павялічаць колькасць марскіх пяхотнікаў, дыслакаваных у Нарвегіі, згодна з планамі, упершыню выкладзенымі ў чэрвені.
Як піша «Европейская правда», пра гэта паведаміла нарвежскае Міністэрства абароны.
Планы павелічэння колькасці марскіх пяхотнікаў у Нарвегіі з 330 да 700 і перамяшчэння некаторых з іх бліжэй да мяжы з Расеяй выклікалі рэзкую рэакцыю Масквы, якая назвала планы «відавочна недружалюбнымі».
Урад у Осла, усё больш занепакоены Расеяй з моманту анэксіі Крыму ў 2014 годзе, намагае на тым, што павелічэнне прысутнасці ЗША прызначанае толькі для навучальных мэтаў і не павінна інтэрпрэтавацца як ваенная эскалацыя.
Марскія пяхотнікі павінны былі пакінуць Нарвегію ў канцы гэтага года пасля таго, як першапачатковы кантынгент прыбыў у 2017 годзе для падрыхтоўкі да баявых дзеянняў у зімовых умовах. Гэта першыя замежныя войскі, размешчаныя ў Нарвегіі з часоў Другой сусветнай вайны.
Міністр замежных спраў краіны Іне Эрыксан Сарэйдэ раней заявіла журналістам, што пастанова не прадугледжвае стварэння сталай базы ЗША ў Нарвегіі і не нацэленая на Расею.
Ратацыя сіл будзе прадаўжацца да пяці гадоў у параўнанні з першасным размяшчэннем, якое прадаўжалася цягам шасці месяцаў з пачатку 2017 года, а затым было падоўжанае ў чэрвені мінулага года.
Нарвегія набывае ў ЗША пяць самалётаў P-8A праз «няўстойлівую сітуацыі з бяспекай» у Паўночнай Атлантыцы, паводле заявы, супольна з падпісанай Брытаніяй, Нарвегіяй і Злучанымі Штатамі. Вялікая Брытанія і Нарвегія супольна будуць выкарыстоўваць аб'екты новай марской патрульнай авіяцыі на палігоне RAF Lossiemouth.