Ігар Бокій здабыў два «золаты» на старце ЧЕ ў плаванні ў Дубліне

Беларус стаў найлепшым на адной са сваіх каронных дыстанцыях - 100 метрах батэрфляем.

Паралімпіец Ігар Бокій здабыў дзве залатыя ўзнагароды на чэмпіянаце Еўропы ў плаванні, які стартаваў у Дубліне (Ірландыя), паведамляе БелТА.

На адной са сваіх каронных дыстанцый - 100 м батэрфляем - беларус у катэгорыі S13 (слаба бачаць) заняў першае месца, паказаўшы вынік 53,95 сек, не дацягнуўшы ўсяго толькі 0,1 сек да паўтарэння свайго ж сусветнага рэкорду.

На дыстанцыі 100 м брасам Ігар Бокій перамог таксама ўпэўнена - 1 хв 05,97 сек. Срэбраную ўзнагароду ў гэтым фінальным заплыве здабыў іншы беларус Уладзімір Ізотаў - 1 хв 07,69 сек.

Ігар Бокій, які з'яўляецца 11-кратным паралімпійскім чэмпіёнам, сёння ў вячэрняй праграме спаборніцтваў мае добрыя шанцы здабыць чарговы медаль.

У кваліфікацыі ён з найлепшым вынікам (2 хв 08,11 сек) пераадолеў 200 м комплексным плаваннем. У катэгорыі S11 (татальна невідушчыя) залатую ўзнагароду ў плаванні 50 м вольным стылем здабыў таксама прадстаўнік беларускай каманды Георгій Зудзілаў - 27,01 сек.

Трэцяе месца сярод атлетаў з мінімальнымі парушэннямі апорна-рухальнага апарата (SB9) заняла беларуска ў фінале на 100 м брасам Аляксандра Свадкоўская, бронзавая ўзнагарода ў актыве Настассі Зудзілавай, якая здолела пераадолець таксама 100 м брасам у катэгорыі SB12. Чэмпіянат Еўропы ў плаванні сярод паралімпійцаў у Дубліне прадоўжыцца да 19 жніўня.