Маскоўскі суд пагадзіўся адпусціць Паўлікаву са следчага ізалятара пад хатні арышт

«Марш маці» даў свой плён?

Дарагамілаўскі суд Масквы 16 жніўня пагадзіўся адпусціць пад хатні арышт Ганну Паўлікаву. Яна будзе жыць у кватэры з бацькамі і сястрой, ёй забаронена весці перамовы праз мабільны тэлефон ды Інтэрнэту, а таксама абмяркоўваць з прадстаўнікамі прэсы абставіны сваёй справы, паведамляе "Настоящее время".

Справа Марыі Дубовік таксама будзе разгледжаная сёння.

Паўлікава і Дубовік, якім 18 і 19 гадоў адпаведна, праходзяць паводле справы "Новай велічы" - "экстрэмісцкай арганізацыі", створанай агентамі ФСБ. Яны сядзяць у следчым ізалятары з вясны 2018 года, і іх стан у турме значна пагоршыўся.

Напярэдадні ў Маскве прайшоў "Марш маці" з патрабаваннем вызваліць Паўлікаву і Дубовік і адмовіцца ад "рэпрэсіўных захадаў" ў дачыненні да падлеткаў у Расеі. Мерапрыемства не было ўзгодненае з уладамі, але мела вялікі рэзананс.

Маці і бацькі расейскіх дзяцей, многія з якіх у апошнія гады сталі фігурантамі крымінальных спраў за ўдзел у пратэстных мітынгах ці допісы ў сацсетках, прынеслі цацкі да Вярхоўнага суда. У суд, дзе разглядалася падаўжэнне арышту Паўлікавай і Дубовік, многія людзі таксама прынеслі мяккія цацкі.

Напярэдадні следчы, які вядзе справу "Новай велічы", папрасіў суд змяніць меру стрымання дзяўчатам. Ён патлумачыў гэта тым, што следства ў дачыненні да іх закончанае, а Паўлікавай невядомыя імёны сведак, і яна не можа на іх ціснуць.

Раней суд адпускаць Дубовік і Паўлікаву са следчага ізалятара катэгарычна адмаўляўся, паказваючы на сур'ёзнасць выстаўленых ім абвінавачванняў. Але гэтым разам пагадзіўся змяніць меру стрымання.

Паўлікаву і Дубовік арыштавалі вясной 2018 года. У аснову іх справы паводле часткі 1 і 2 артыкула 282 КК РФ ("Стварэнне і ўдзел у экстрэмісцкай супольнасці") ляглі сведчанні капітана крымінальнага вышуку, аператыўніка Цэнтра "Э" МУС Міхаіла Растаргуева і ягоных агентаў, у тым ліку ўкаранёнага у арганізацыю супрацоўніка ФСБ , і яшчэ аднаго засакрэчанага сведкі. Менавіта яны былі аднымі з арганізатарак "экстрэмісцкай арганізацыі, якая планавала зрынанне дзяржаўнай улады ў Расеі", і, сярод іншага, напісалі яе статут.

Усяго паводле справы "Новай велічы" арыштаваныя дзевяць чалавек. Чацвёра, уключаючы двух дзяўчат (Паўлікава на момант затрымання была непаўналетняй), застаюцца ў следчым ізалятары.

Адвакаты некалькі разоў прасілі суд перагледзець меру стрымання як мінімум для Паўлікавай і Дубовік, мяркуючы, што дзяўчатам, якія не бралі актыўнага ўдзелу ў дзейнасці арганізацыі, неабавязкова знаходзіцца пад вартай.

У Паўлікавай і Дубовік пачаліся складанасці са здароўем. Паўлікава скардзілася, што яе трымалі ў халоднай камеры, праз гэта ў яе ўзніклі праблемы з ныркамі і рэпрадуктыўнымі органамі, а ў Дубовік выявілі пухліну і пачаліся праблемы з шчытападобнай залозай, зрокам і страваваннем. Усе абвінавачаныя паводле справы "Новай велічы" неаднаразова заяўлялі пра выкарыстанне следчымі да іх катаванняў і пагроз для атрымання прызнавальных сведанняў.

Аднак у ФСВП заявілі, што арыштаваным "не патрабуецца экстранае лячэнне", і ацанілі іх стан "як прымальны".