Крык душы заўзятара менскага «Дынама»: Я не веру ў іх сумленнасць як спартоўцаў

Шэсць прычын, чаму матч «Зеніт» - «Дынама» Менск выклікае падазрэнні.

Сёння раніцай у каментарах на спартовым партале «Трибуна» карыстальнік kravsha, мабыць, сабраўшыся з думкамі за ноч, напісаў вялікі тэкст, які можна назваць крыкам душы. Чалавек назваў матч «Зеніт» - «Дынама» надзвычай дзіўным і прывёў шэсць пунктаў, якія, на ягоную думку, выклікаюць падазрэнні. Сярод іх - рэакцыя Гурэнкі на галы, гульня Гарбунова і знікненне Нікаліча (праўда, ужо пасля напісання гэтага каментара з'явілася інфармацыя, што серб не гуляў нібыта праз пашкоджанне). У канцы тэксту карыстальнік практычна абвінавачвае менскую каманду ў здачы матчы: «Я не веру ў іх сумленнасць як спартоўцаў. Нешта вельмі нядобрае ўчора выканалі, бруднае, ганебнае, ды яшчэ і непераканаўча спрацавалі, трапіліся». Каментар набраў ужо 45 упадабаек ад іншых карыстальнікаў. А вы верыце ў такую тэорыю змовы?

- Надзвычай «дзіўны» «матч», тут эпітэты пра «калгаснікаў» і «дзеравеншчыну» ў тэму, бо прафесіяналы так не трапляюцца ў 21 стагоддзі.

1. Галоўнае пытанне - куды, напрыклад, знік Нікаліч. Найлепшы гулец першага матчу, у Піцер прыехаў, напярэдадні матчу даваў свае каментары наконт будучай гульні, нават расейцы яго запомнілі і дзівіліся, чаму ён не ў заяўцы, але «Прадстаўнікі «Дынама» не маглі нам даць адказ, што з Нікалічам. Тым больш, што раніцай з ім усё было ў парадку», - сказаў Багданаў ў эфіры «Матч Прэм'ер».

2. Чаму не выйшаў на поле «незаменны» сын ГТ Арцём Гурэнка? Не паленаваўся і паглядзеў, ён з 24 чэрвеня стабільна з'яўляўся на полі хоць бы на замену (11 гульняў «Дынама» запар), а тут матч 120 хвілін з 4 заменамі, пабегаць-пазмагацца ў абароне гэты гулец у прынцыпе здольны, але Сяргей Гурэнка раптам наважыў «паберагчы» сына.

3. Першы гол - дзіка дзіўная гульня Гарбунова, мяч відавочна апускаецца яму за спіну, ён увесь палёт выпраўляе яго вачыма, але не адыходзіць ў браму, і нават не выцягвае рукі ўверх (!), тупа вылуплівае вочы.

4. Пенальці Дзюбы ў браму - Гарбуноў пачынае падаць у ніжні кут брамы яшчэ падчас разбегу Дзюбы, той фактычна б'е па ўжо пустой браме, брамнік ужо валяецца як мех з бульбай.

5. Ну і агулам немагчыма слабая гульня Гарбунова ўвесь матч, балюча пераглядаць і разбіраць усе эпізоды. Каму цікава, можна паглядзець наступны галявы момант «Зеніту» адразу пасля таго, як лік стаў 4-0, на 84-й хвіліне, прастрэл з флангу Кузяева, Дзюба б'е галавой і ледзь-ледзь не трапляе, Гарбуноў чамусьці скача спіной у браму, то бок, калі б ён і дастаў мяч рукой, то ўжо ў браме.

Надзвычай слабая і дзіўная гульня «Дынама» ў абароне. Удвая слабейшая і дзіўная на фоне першага матчу, які адбыўся 7 дзён таму, і ў якім менчукі паказалі добрую фізічную падрыхтоўку, адпрацоўвалі, закрывалі ўсе вольныя зоны, навязвалі барацьбу, блакавалі кірунак перадач і ўдараў і г.д. Тут усё наадварот - нібыта бегаюць побач, але ўвесь час не дабягаюць, губляюць гульцоў у штрафной, пакідаюць свабодныя зоны гульцам «Зеніту» і г.д. Асабліва гэта пачынала кідацца ў вочы пасля выдалення Парадзеса з лікам 2:0 і ў пачатку другой дададзенай 15-хвілінкі пры 4:1: менчукі раптам ператвараліся ў 7-гадовых дзяцей на ватных ножках, поўны зброд неабучаных прыдуркаў, увогуле, эпітэтаў бракуе, думка ў тым, што не можа прафесійная футбольная каманда за тыдзень начыста забыць, як гуляць у абароне, тым больш стадыён быў пусты, суддзя ў асноўным, можна сказаць, ім спрыяў (штукі 3 пенальці мог паставіць лёгка), ну не было з чаго ім раптам разваліцца і паплыць.

6. Дзіўная рэакцыя Гурэнкі на гол Хвашчынскага, галаву рукамі абхапіў, тады як усе вакол на лаўцы радуюцца, г.зн., яшчэ не стала зразумела, што гол скасаваны.

Ды шмат яшчэ чаго можна напісаць, але надакучыла. Наплявалі ў душу. Самую моцную агіду выклікае гэтая «каманда», ледзь не да ванітаў. Я не веру ў іх сумленнасць як спартоўцаў. Нешта вельмі нядобрае ўчора выканалі, бруднае, ганебнае, ды яшчэ і непераканаўча спрацавалі, спаў. Цьфу.