Трамп паабяцаў набыць знішчальнікі на зэканомленыя на парадзе грошы

Вайсковы парад у гонар стагоддзя заканчэння Першай сусветнай вайны ў ЗША вызначылі не праводзіць.

Прэзідэнт ЗША Дональд Трамп у сваім Twitter заявіў, што на грошы, зэканомленыя дзякуючы скасаванню вайсковага парада, можна будзе закупіць знішчальнікі, піша РБК.

Трамп напісаў, што мясцовыя палітыкі, якія «дрэнна кіруюць Вашынгтонам, ведаюць, як атрымаць нечаканы прыбытак, калі бачаць яго». Як растлумачыў прэзідэнт, калі палітыкаў папрасілі назваць кошт правядзення вайсковага параду, яны «захацелі настолькі смяхотна высокую суму», што Трамп быў вымушаны скасаваць яго.

Кіраўнік дзяржавы таксама паведаміў, што наведае парад, запланаваны на базе Эндрус, і парад у Парыжы 11 лістапада. Трамп таксама заявіў, што, магчыма, атрымаецца арганізаваць парад налета, калі знізіцца кошт, а пакуль «можна закупіць пабольш знішчальнікаў».

Напярэдадні Reuters са спасылкай на прадстаўніка Пентагона паведаміла, што вайсковы парад у гонар стагоддзя заканчэння Першай сусветнай вайны, які хацеў правесці Трамп, перанеслі на 2019 г. З ягоных слоў, яго кошт быў ацэнены на $92 млн.

У лютым Трамп звярнуўся да Міністэрства абароны, каб яно распрацавала план «грандыёзнага» параду для святкавання «вайсковай моцы» краіны.