Не «Актоберфэстам» адзіным: самыя цікавыя піўныя фэсты восені

Беларусам варта прыгледзецца да фэстаў Польшчы і Украіны.

Лета сканчаецца - пара планаваць восеньскі піўны адпачынак. Верасень - адзін з самых папулярных перыядаў для піўных фэстаў. Але і астатнія месяцы багатыя на яркія падзеі. Pivo.by выбралі для вас восеньскія фэсты, якія варта наведаць.

Craft Beer Fest

Дата: 1-2 верасня 2018 года Месца: Кіеў, ВДНГ, павільён №3 (пр-т. Акадэміка Глушкова, 1) Квіткі: 150 грн/дзень

Ноч у цягніку ці паўтары гадзіны ў самалёце - і вы ў Кіеве. Украінскае піва добра знаёмае беларускім спажыўцам, але пра мясцовае крафтавае піва пакуль не ўсе ведаюць. Кіеўскі Craft Beer Fest - добрая магчымасць пазнаёміцца практычна з усімі важнымі гульцамі ўкраінскага крафтавага рынку. Тым больш, што за два гады, якія прайшлі з часу нашай паездкі туды, шмат што змянілася. Гэтым разам на фэсце будзе прэзентавана больш за 40 бровараў і 100 гатункаў піва. Акрамя піва, можна будзе паслухаць і патанчыць пад музыку, пазаймацца піўной ёгай і, вядома, смачна паесці на фудкорце.

The Beavertown Extravaganza

Дата: 7-8 верасня 2018 года. Месца: Лондан, Printworks (Surrey Quays Rd) Квіткі: £40/дзень, £65

Extravaganza арганізуецца броварам Beavertown і да нядаўняга часу лічыўся адным з самых цікавых крафтавых фэстаў Еўропы. Праўда, пасля продажу Beavertown канцэрну Heineken, стаўленне многіх удзельнікаў моцна змянілася: практычна палова з першапачаткова заяўленых 90 бровараў адмовілася ад удзелу ў фэсце. Але нягледзячы на гэта яго склад і геаграфія застаюцца вельмі цікавымі: амерыканцы The Lost Abbey, Firestone Walker, New Belgium, дацкія бровары Mikkeller, ToØl, шведы Omnipollo і Stockholm Brewing і нават Garage Project з Новай Зеландыі.

One More Beer Festival

Дата: 21-22 верасня 2018 года. Месца: Кракаў, Chemobudowa (ul. Stanisława Klimeckiego, 24) Квіткі: 199 zł/сесія, 499 zł

У Польшчы лакальныя фестывалі праходзяць ледзь не кожныя выхадныя. Але One More Beer Festival на іх фоне прыкметна вылучаецца. Гэта першы фестываль з кучай запрошаных бровараў з розных краін (звычайна палякі абмяжоўваюцца сваімі броварамі і півам, прывезеным імпарцёрамі) і фарматам «плаціш адзін раз і п'еш колькі хочаш». Фестываль складаецца з трох сесій па 4,5 гадзіны, на кожную з якіх можна купіць асобны білет.

А можна купіць адразу на ўсё і не абмяжоўваць сябе ні ў чым. Гэтым разам у Кракаў прыедуць топавыя амерыканцы Jester King, Superstition, Equilibrium, бельгійцы De Struise, датчане Amager, англічане Northern Monk, расейцы Zagovor, эстонцы Põhjala і найлепшыя польскія бровары, сярод якіх Kingpin, Pinta, Zakładowy, Piwne Podziemie і, вядома, арганізатары імпрэзы Pracownia Piwa.

Borefts Beer Festival

Дата: 21-22 верасня 2018 года. Месца: Бадэгравен, Brouwerij De Molen (Doortocht 4) Квіткі: €35-55

Калі фестываль у Кракаве для вас не дастаткова крафтавы, то вам абавязкова варта ехаць у нідэрландскі гарадок Бадэгравен, дзе праходзіць фестываль Borefts, арганізаваны броварам De Molen. Тут усё па-крафтаваму: месцам правядзення з'яўляецца сам завод і прылеглыя да яго тэрыторыі, а колькасць удзельнікаў і гасцей абмежаваная. Сёлета ў лайн-апе значацца 22 бровары - запар еўрапейскі топчык: AF Brew, Alvinne, Borg, Beerbliotek, De Natte Gijt, Monyo, North Brewing, Sori, Tommie Sjef Wild Ales.

Oktoberfest

Дата: 22 верасня-7 кастрычніка 2018 года. Месца: Мюнхен

Было б блюзнерствам не згадаць галоўны піўны фестываль свету - «Актобэрфэст». Няхай ён вельмі кансерватыўны і для большасці біргікаў не цікавы, дзясяткі тысячы людзей з'язджаюцца ў Мюнхен у канцы верасня, каб акунуцца ў атмасферу баварскага свята, дзе ў велізарных намётах піва льецца ракой. У некаторых з іх літровы кухаль піва сёлета абыдзецца наведвальнікам даражэй €11 - новы рэкорд фестывалю. Нягледзячы на пастаянны рост кошту, у сярэднім на «Актоберфэсце» выпіваецца 7 млн літраў піва і 95 тысяч літраў віна, а наведвальнікі з'ядаюць 280 тысяч сасісак і 75 тысяч свіных галёнак. Вось як гэта выглядала, напрыклад, летась.

Minsk Craft Beer Fest

Дата: 29 верасня 2018 года. Месца: Менск

Галоўны піўны фестываль Менска яшчэ не анансаваны, але ўжо вядома, што ён адбудзецца прыкладна 29 верасня. Красавіцкі Minsk Craft Beer Fest прайшоў больш чым удала: у крэатыўным кластары Ok16 можна было паспрабаваць піва практычна ўсіх беларускіх міні-бровараў, а таксама шмат імпартнага крафту. Быў фудкорт, забаўляльная і гульнявая зоны, выступалі музыкі і дыджэі - увогуле, быў сапраўдны фестываль, які можна смела параўнаць з еўрапейскімі. Восенню будзе не горш!

Warszawski Festiwal Piwa

Дата: 26-28 кастрычніка 2018 года. Месца: Варшава, Stadion Miejski Legii Warszawa (ul. Łazienkowska, 3) Квіткі: ад 15 zł

Галоўны фестываль Польшчы - Warszawski Festiwal Piwa - пройдзе ў Варшаве ўжо дзявятым разам. Як і ў апошнія некалькі разоў, яго ўдзельнікамі стануць больш за паўсотні бровараў, пераважна з Польшчы. Склад яшчэ не абвешчаны, але з 99% верагоднасцю там можна будзе пакаштаваць навінкі (а іх да фестывалю рыхтуюць усе і шмат) ад AleBrowar, Artezan, Brokreacja, Piwne Podziemie. Праўда, дата фестывалю яшчэ не канчатковая: у выпадку выхаду варшаўскай «Легіі», на стадыёне якой праходзіць WFP, у групавы этап Лігі Еўропы, фестываль могуць пасунуць - футбол важнейшы.

Örebrewfest

Дата 10 лістапада 2018 года. Месца: Эрэбру, Kulturhuset (Järnvägsgatan 8) Квіткі: ад 200 SEK

Эрэбру - адзін з найбуйнейшых гарадоў Швецыі, размешчаны ля жывапіснага возера Ельмарэн. Там жыве 100 тысяч жыхароў і працуе выдатны аднайменны бровар Örebro. Нядаўна півавары наважылі, што пара правесці свой фэст і запрасілі на яго найлепшыя мясцовыя бровары - Dugges, O/O, Brewski, Stigbergets, а таксама сяброў з Даніі (Mikkeller ва ўсіх праявах, у тым ліку два амерыканскіх аддзяленні), Нарвегіі (Cervisiam і Lervig) і іншых краін. Фестываль выглядае шматабяцальным і, напэўна, з часам ператворыцца ў адзін з найлепшых у Скандынавіі.

Lubelskie Targi Piw Rzemieślniczych

Дата: 23-24 лістапада 2018 года. Месца: Люблін, Targi Lublin (ul. Dworcowa 11) Квіткі: 7 zł

Яшчэ адзін цікавы польскі фестываль - Lubelskie Targi Piw Rzemieślniczych. Ён адрозніваецца і ад кракаўскага, і ад варшаўскага фестываляў сваёй мернасцю і правінцыйнасцю, але практычна не саступае сталічнаму па асартыменце. Тут ніхто не спяшаецца: за два дні можна спакойна пакаштаваць ледзь не ўсе гатункі, якія прывязуць півавары.

Billie's Craft Beer Fest

Дата: 30 лістапада-1 снежня 2018 года. Месца: Антвэрпэн, Waagnatie (Rijnkaai 150) Квіткі: ад €55

Завяршыць піўную восень можна паездкай у Бэльгію. Billie's Craft Beer Fest праходзіць у Антвэрпэне і лічыцца адным з найлепшых крафтавых фэстаў Бэльгіі. Сёлета ў ім возьмуць удзел больш за 50 бровараў. Сярод хэдлайнераў заяўленыя The Alchemist, Tilquin, Cloudwater, De Molen, De Ranke, Magic Rock, Pipeworks, The Kernel, Verdant, Alefarm. Будзе што пакаштаваць!