Новы кіраўнік Аршанскага раёна займаўся не стварэннем працоўных месцаў, а іх скарачэннем

Пяць малавядомых фактаў пра Ігара Ісачэнку.

Кароткая біяграфія Ігара Ісачэнкі такая. Нарадзіўся ў 1969 годзе ў Лёзна, скончыўшы Кіеўскую вышэйшую вайсковую вучэльню, блізу 10 гадоў служыў у беларускіх Узброеных сілах. Затым змяніў кар'еру вайскоўца на грамадзянскую, узначальваў «Віцебскаблгаз» і «Віцебскаблводаканал». З 2014 года кіраваў камітэтам архітэктуры і будаўніцтва аблвыканкама.

Udf.by распавядае, што засталося за рамкамі афіцыйнай біяграфіі Ігара Ісачэнкі.

Скарачаў колькасць прадпрыемстваў

Лукашэнка дамагаецца, каб у Аршанскім раёне павялічвалася колькасць працоўных месцаў. Але новы кіраўнік рэгіёну дагэтуль займаўся зусім іншым. Калі некалькі гадоў таму грымнуў чарговы крызіс, Ісачэнка аптымізаваў колькасць будаўнічых прадпрыемстваў. Адны арганізацыі аб'ядноўвалі, іншыя наогул ліквідавалі.

Дарэчы, Ісачэнка спакойна паставіўся да банкруцтва Аршанскага завода жалезабетонных вырабаў. Здаецца, Лукашэнка быў не ў курсе гэтага.

Прыстойна зарабляў

Дзякуючы таму, што Ігар Ісачэнка балатаваўся ў «дэпутаты» абласнога савета, сталі вядомыя прыбыткі чыноўніка ў яго бытнасць дырэктарам «Віцебскаблводаканала». У 2013 годзе Ісачэнка атрымаў 199 988 843 рублёў. На той момант гэта складала блізу 22 тысяч даляраў. Або блізу 1 850 даляраў за месяц.

Працаваў шэсць дзён на тыдзень

Некалькі гадоў таму Ігар Ісачэнка распавядаў журналістам, што працуе з раніцы да позняга вечара, у тым ліку і ў суботу. Праз гэта ў яго заставалася мала часу на сям'ю. А ў чыноўніка, між іншым, трое дзяцей.

Спрачаўся з міністрам праз смеццеправоды

Гэта адбылося ў 2016 годзе. На вышэйшым узроўні вырашылі, што пры будаўніцтве новых дамоў трэба адмаўляцца ад смеццеправодаў: праз іх даражэй вывозіць адходы, да таго ж з'яўляецца антысанітарыя.

Але калі міністр ЖКГ Аляксандр Церахаў прыехаў у Віцебск, старшыня камітэта архітэктуры і будаўніцтву аблвыканкама Ігар Ісачэнка заявіў, што грамадзяне пакуль не гатовыя адмовіцца ад смеццеправодаў, таму жылыя дамы, якія будуюцца і плануюцца да ўзвядзення на Віцебшчыне, імі будуць абсталяваныя.

У дыскусію ўмяшаўся кіраўнік аблвыканкама Мікалай Шарстнёў, які выказаўся за кантэйнерныя пляцоўкі для паасобнага збору смецця замест смеццеправодаў.

З дваякім пачуццём ставіўся да задач, пастаўленым зверху

Калі Ісачэнка ўзначальваў «Віцебскаблводаканал», журналісты газеты «Витьбичи» сур'ёзна пацікавіліся ў яго:

«Пытанне на дзяржаўным узроўні ставіцца так: забяспечыць жыхароў усіх населеных пунктаў якаснай вадой. Ад таго, якую ваду мы п'ём, залежыць наша здароўе. Што робіцца ў гэтым плане?».

На гэта кіраўнік адказаў так:

«У гэтай сувязі ўспомніўся зусім свежы характэрны факт. Шэсць жыхароў адной з вёсак Дубровенскага раёна вырашылі, што яны будуць карыстацца вадой з калодзежаў, і толькі адзін - з калонкі. Утрымліваць дзеля аднаго жыхара вадаправодныя сеткі справа стратная. І што вы думаеце? Усё роўна пайшлі на гэта. Практычна праз дзень у мароз за сорак кіламетраў ад базавага прадпрыемства туды ездзіць «аварыйная» машына, каб адагрэць ваду ў калонцы. Але ездзіць!»

Як доўга Ісачэнка пратрымаецца на новай пасадзе?

Атрымаўшы прызначэнне на пасаду старшыні Аршанскага райвыканкама, Ігар Ісачэнка выказаў упэўненасць, што пастаўленыя задачы яму па плячы. Але варта ўлічваць, што ўвага Лукашэнкі да рэгіёну пасля нядаўняга разносу стала яшчэ большай. Лукашэнка вобразна заявіў, што ў раёне павінна адбыцца «рэвалюцыя».

Папярэднікі Ісачэнкі ціску не вытрымалі. Леанід Пянькоўскі пратрымаўся на чале раёна менш за тры месяцы. Шакаваны пранікненнем у яго дом сілавікоў, чыноўнік заявіў, што працаваць яму не дазваляе стан здароўя.

Аляксандр Пазняк, які змяніў яго прапрацаваў усяго год, пакуль нядаўна не быў з ганьбай звольнены кіраўніком краіны.