З'езд партыі Эрдагана: Парашэнка перадаў пасланне, «дэпутата» РФ прагналі

18 жніўня ў Анкары адбыўся VI з'езд кіроўнай Партыі справядлівасці і развіцця Турцыі.

Прэзідэнт Украіны Пятро Парашэнка перадаў асабістае пасланне прэзідэнту Турцыі Рэджэпу Эрдагану.

Пра гэта паведаміў кіраўнік Меджліса крымска-татарскага народа Рэфат Чубараў у сваім Facebook, паведамляе eurointegration.com.

18 жніўня ў Анкары адбыўся VI з'езд кіроўнай Партыі справядлівасці і развіцця Турцыі (AKP), заснавальнікам якой з'яўляецца Эрдаган, распавёў Чубараў.

У Анкару прыбылі афіцыйныя дэлегацыі з розных краін, якія ўзначальваюць найвышэйшыя дзяржаўныя службовыя асобы. Парашэнка як уласнага прадстаўніка накіраваў упаўнаважанага прэзідэнта Украіны ў справах крымска-татарскага народа Мустафу Джамілева.

"Вядома, што ў Анкары Мустафа Джамілеў таксама ўручыў прэзідэнту Турцыі Рэджэпу Таіпу Эрдагану асабістае пасланне прэзідэнта Украіны Пятра Парашэнкі", - напісаў Чубараў.

Дэлегацыю Расеі на з'ездзе ўзначаліў старшыня Дзяржаўнай Думы Вячаслаў Валодзін. Пры гэтым у складзе расійскай дэлегацыі апынуўся крымскі калабарацыяніст і "дэпутат Дзяржаўнай думы" Руслан Бальбек.

"Раз турэцкая старана не давала згоды на ўключэнне ў склад дэлегацыі РФ, запрошанай на з'езд, крымскага калабарацыяніста Руслана Бальбека, непажаданага "госця" не дапусцілі. Замест урачыстай залы, дзе праходзіў з'езд AKP, памагатага расейскіх акупантаў Руслана Бальбека правялі ў амбасаду РФ, дзе ён зможа дачакацца часу адлёту дэлегацыі думы ў Маскву", - падкрэсліў Чубараў.

Як вядома, ЕЗ дадаў у спіс асоб і кампаній, у дачыненні да якіх дзейнічаюць санкцыі ў сувязі з парушэннем тэрытарыяльнай цэласнасці, суверэнітэту і незалежнасці Украіны, дэпутатаў Дзяржаўнай думы РФ, абраных у акупаваным Крыме.

У спіс уключаныя пяць дэпутатаў ад Крыму Канстанцін Бахараў, Руслан Бальбек, Андрэй Казянкоў, Святлана Саўчанка, Павел Шпераў і дэпутат ад Севастопаля Дзмітрый Белік.