Угода «Раснафты» ўдарыла па рублю ў 20-ю гадавіну дэфолту

Расейская валюта аднавіла падзенне.

Рубель аднавіў падзенне на Маскоўскай біржы ў пятніцу ў 20-ю гадавіну дэфолту 1998 года, калі абрынулася піраміда ДКА, пахаваўшы пад абломкамі ашчаджанні насельніцтва і палову банкаўскай сістэмы РФ, паведамляе finanz.ru.

Курс даляра зноў падняўся вышэй за 67 рублёў, дадаўшы 60 капеек за дзень і 5 рублёў з пачатку жніўня, а еўра размяняў 77 рублёў і вярнуўся да ўзроўню канца мінулага тыдня.

За гадзіну да канца асноўнай сесіі ўгоды з разлікам «заўтра» на МасБіржы праходзілі па 67,5250 рубля за даляр і 77,0750 рубля за еўра. Колькасць заявак на куплю амерыканскай валюты перавышала колькасць прадаўцоў 1,4 разы, а па еўра - у 4 разы.

Да адтоку капіталу з дзяржаўных аблігацый РФ, што падаюць 13 сесій запар і трамбуюць мінімумы з лістапада 2016 года, дадаўся адток даляраў пад патрэбы «Раснафты», адзначае ў аглядзе Ашчадбанк CIB.

Банк ЗГБ падаў 2 млрд даляраў катарскаму фонду QIA на куплю акцый «Раснафты» з пакета, прыватызаванага ў снежні 2016 года.

Першапачаткова ўгоду фінансаваў італьянскі Intesa, але не знайшоўшы ахвочых укласціся ў гэты крэдыт, летам мінулага года запатрабаваў выплаты.

Спроба знайсці грошы ў Кітаі поспехам не ўвянчалася: кітайская CEFC, пагадзілася выкупіць тры чвэрці прыватызаваных акцый, трапіла пад расследаванне, а яе кіраўнік Йе Яньмін быў арыштаваны ў студзені праз падазрэнне ў эканамічных злачынствах.

Адток валюты на крэдыт Катару пагоршыў дэфіцыт даляраў на рынку, а заняць у валюце стала даражэй: стаўка валютнага свопу ўпала ніжэй за 6%, а базіс овернайт асеў ніжэй мінус 100 б.п.

Пры гэтым абарот на рынку валютных свопаў, якія дазваляюць прыцягваць даляры пад заклад рублёў, апусціўся да 8 млрд даляраў, што «значна ніжэй за нармальны ўзровень» (12 млрд), адзначае Ашчадбанк CIB.

«Гэта сведчыць пра скарачэнне валютнай ліквіднасці, якое магло быць абумоўлена выдаваннем крэдыту на $2 млрд ад ЗГБ катарскаму фонду для фінансавання пакупкі акцый Раснафты», - пішуць стратэгі Том Левінсан, Юрый Папоў і Мікалай Мінко.

Рубель застаецца пад ціскам, і напружанне нарастае, кажа намеснік дырэктара аналітычнага дэпартамента «Альпары» Ганна Кокарава: нерэзідэнты працягваюць распрадаваць расейскія актывы, тады як нафта знаходзіцца паблізу мінімальных з красавіка ўзроўняў (71,8 даляра за барэль Brent).

З пачатку жніўня рубель страціў 8% да даляра і 5% да еўра, а з красавіка, калі пад амерыканскі санкцыйных каток трапіў «Русал», абясцэніўся на 20% (курс даляра вырас на 11 рублёў).

Рызыкі санкцый працягваюць пераважаць над рынкам: рубель застанецца на дасягнутых адзнаках найбліжэйшым часам, кажа вядучы аналітык «Адкрыццё Брокер» Андрэй Качаткоў.