Расейскай эканоміцы выдалі «штармавое папярэджанне»
1- 20.08.2018, 17:13
- 15,680
Над расейскай эканомікай прадаўжаюць згушчацца хмары спаду аплатаздольнага попыту і новых санкцыяў ЗША.
Зводны апераджальны індэкс, які разлічваецца для Расеі паводле метадалогіі АЭСР і складаецца з параметраў, якія ўплываюць на будучую дынаміку ВУП, у ліпені абрынуўся з рэкорднай за 2,5 года хуткасцю (на 3,8 адсоткі) і ўпершыню з лета 2016 года стаў адмоўным - мінус 0,1%, піша finanz.ru.
Расейская эканоміка зноў адчула слабасць, нягледзячы на тое, што кошты нафты трымаюцца паблізу 4-летніх максімумаў (вышэй за 70 даляраў за барэль Brent): адбілася значнае падзенне ўнутранага попыту, якое выявілася ў скарачэнні колькасці новых заказаў для рэальнага сектара, адзначае ў «Каментарах аб дзяржаве і бізнэсе» Цэнтр Развіцця Вышэйшай школы эканомікі.
Разлічаны АЭСР баланс (розніца) станоўчых і адмоўных зменаў плыні новых заказаў зафіксаваў значнае зніжэнне: яго існы ўзровень - мінус 22,5% - мінімальны з сярэдзіны 2015 года, калі эканоміка знаходзілася ў эпіцэнтры крызісу - падалі ВУП, прамысловасць, раздробны гандаль і даходы насельніцтва.
Цяпер жа, згодна з Расстатам, усё гэта ў мінулым: за квартал ВУП дадаў 1,7%, рэальныя заробкі растуць на 7,2%, а прамысловасць перажывае сапраўдны бум: аб'ёмы выпуску падскочылі на 3,9% агулам у эканоміцы і на 4,6% - у не сыравінным сектары.
Афіцыйныя звесткі ўсё далей адрываюцца ад незалежных ацэнак, заснаваных на апытаннях прадстаўнікоў рэальнага сектара, адзначае дырэктар аналітычнага дэпартамента «Лока-Інвест» Кірыла Трэмасаў.
Так, індэкс дзелавой актыўнасці (PMI), які разлічваецца Markit і ацэньвае аб'ёмы вытворчасці, колькасць занятых і колькасць заказаў, тры месяцы запар знаходзіцца ніжэй за рысу ў 50 пунктаў, якая аддзяляе рост ад сціску, а яго ліпеньскае значэнне - 48,1 пункта - мінімальнае з 2016 года.
Звесткі Markit малююць тую ж сітуацыю, што і ацэнкі АЭСР, паказвае намеснік дырэктара Цэнтра развіцця ВШЭ Сяргей Смірноў: прамыслоўцы скардзяцца на скарачэнне попыту - як унутранага, так і вонкавага. Аб'ёмы заказаў на экспарт ўпалі ўпершыню з пачатку 2018 года, аб'ёмы новага бізнэсу скараціліся максімальна з траўня 2015 года.
«Хоць выкарыстанне АЭСР працэдуры ліквідацыі сезоннасці можа ўносіць нейкія свае невядомыя «ваганні» на канцах часовага шэрагу, скарачэнне ўнутранага попыту на прадукцыю расейскай прамысловасці, відавочна, бясспрэчнае, разважае Смірноў. - Калі ж гэтая тэндэнцыя прадоўжыцца, расейская эканоміка неўзабаве цалкам можа зноў апынуцца ў стане стагнацыі».
Сітуацыю пагаршаюць павышэнне падаткаў і санкцыі, кажа галоўная эканамістка «Альфа-банка» Наталля Арлова: адабранне рэсурсаў у бізнэсу і насельніцтва ўдарыць па спажыванні, а страх новых абмежаванняў - павышае нявызначанасць. Усе гэта запаволіць рост ВУП да 1% у 2019 годзе, прагназуе яна.
«Увядзенне забароны на куплю новай дзярпазыкі адназначна павысіць кошт запазычанняў для Мінфіна, што ляжа дадатковай нагрузкай на бюджэт - у эканамічных тэрмінах гэта азначае падвышэнне выдаткаў для эканомікі», - кажа Трэмасаў.
«Пра блакаванне карэспандэнцкіх рахункаў расейскіх дзяржбанкаў у амерыканскіх і казаць няма чаго. Калі да гэтага дойдзе (я думаю, што найбуйнейшы банкі гэтыя захады ўсё ж не закрануць), то гэта таксама будзе азначаць дадатковыя выдаткі для эканомікі. Іншымі словамі, увесь гэты набор абмежаванняў непазбежна будзе мець негатыўны макраэканамічны эфект, што яшчэ больш пагоршыць нашу і без таго нялёгкую сітуацыю», - дадае ён.