Улады саступілі ў «бітве за ўраджай»?

Ураджай на 2 мільёны тон саступае мінулагодняму.

Масавае жніво заканчваецца ў сельгасарганізацыях Беларусі, валавы збор будзе прыкладна на 2 млн тон меншы, чым летась, паведаміў агенцтву «Інтэрфакс-Захад» намеснік начальніка галоўнай управы раслінаводства Міністэрства сельскай гаспадаркі і харчавання Васіль Ядлоўскі.

«Без уліку кукурузы мінус 2 млн тон у параўнанні з мінулым годам», - канстатаваў В.Ядлоўскі.

Паводле аператыўных звестак Мінсельгасхарча, на 22 жніўня збожжавыя і зернебабовыя культуры ў сельгасарганізацыях сабраныя на 1,9 млн га (амаль 95% да плана). Намалот збожжа роўны 5,1 млн тон (7 млн тон на тую ж дату мінулага года пры 91% убраных плошчаў).

Ураджайнасць на гэты момант складваецца на ўзроўні 26,4 ц/га супраць 35,7 ц/га ў 2017 годзе.

Як удакладніў суразмоўца агенцтва, у жніўні і верасні яшчэ прадоўжыцца жніво позніх культур - грэчкі і проса, якія трохі павялічаць агульны намалот. Акрамя таго, як прагназуюць у Мінсельгасхарчы, будзе сабрана яшчэ блізу 1-1,3 млн тон збожжа кукурузы.

«Такім чынам, разлічваем атрымаць дзесьці 6,5 млн тон збожжа ў бункернай вазе», - адзначыў В.Ядлоўскі. Агулам, валавы збор збожжа з улікам кукурузы ў 2018 годзе ў параўнанні з 2017 годам будзе ніжэйшы прыкладна на 25%.

Як растлумачыў суразмоўца, больш нізкі ўраджай сёлета - следства засухі, якая мела месца ў траўні-чэрвені гэтага года. Акрамя таго, моцныя дажджы ў другой палове ліпеня прывялі да зніжэння тэмпаў жніва і выклікалі дадатковыя страты.

Як паведамлялася, першапачаткова ў 2018 годзе ва ўсіх катэгорыях гаспадарак Беларусі валавы збор збожжа планаваўся на ўзроўні 9 млн тон, у тым ліку ў сельгасарганізацыях - 8,3 млн тонаў.

У 2017 годзе, паводле звестак Нацыянальнага статыстычнага камітэта, у вазе пасля дапрацоўкі ў рэспубліцы атрымалі 7,99 млн тон збожжа.