Малдова будзе выдаваць грамадзянства ў абмен на інвестыцыі
7- 22.08.2018, 18:48
- 12,394
Згодна з разлікам уладаў, гэта дазволіць прыцягнуць у эканоміку краіны не менш за 1,3 млрд еўра да 2024 года.
Урад Малдовы зацвердзіў механізм выдавання грамадзянства рэспублікі ў абмен на інвестыцыі.
Пра гэта паведаміла прэс-служба Міністэрства эканомікі і інфраструктуры Малдовы, паведамляе eurointegration.com.
Згодна з разліках уладаў, гэта дазволіць прыцягнуць у эканоміку краіны не менш за 1,3 млрд еўра да 2024 года.
У новай праграме выдавання грамадзянства змогуць удзельнічаць асобы, якія «не былі абвінавачаныя Міжнародным крымінальным судом, не падвяргаліся крымінальнаму пераследу з боку Інтэрпола, не з'яўляюцца патэнцыйнай пагрозай незалежнасці і нацыянальнай бяспецы Малдовы, не атрымлівалі даходаў ад злачыннай дзейнасці і не былі прызнаныя вінаватымі ва ўчыненні тэрарыстычных злачынстваў», гаворыцца ў паведамленні.
Грамадзяніну, які жадае атрымаць малдаўскае грамадзянства, прапануецца ўнесці бязвыплатны ўзнос у Фонд дзяржаўных інвестыцый для ўстойлівага развіцця ў аб'ёме не менш за 100 тысяч еўраў.
Пры гэтым, калі на атрыманне грамадзянства прэтэндуе асоба, якая мае жонку (мужа) і дзяцей, яму неабходна інвеставаць не менш за 250 тысяч еўра ў адну са стратэгічных галін рэспублікі (па меркаванні ўладаў). У гэтым выпадку на грамадзянства могуць прэтэндаваць і іншыя сямейнікі.
Гэтую ініцыятыву малдаўскіх уладаў раскрытыкавала апазіцыя, а таксама міжнародныя арганізацыі, у прыватнасці Еўрапейская камісія. У Брусэлі занепакоеныя тым, што ўладальнікамі грамадзянства Малдовы могуць стаць грамадзяне з сумнеўнай рэпутацыяй з розных краін. З дапамогай атрымання малдаўскага грамадзянства яны атрымаюць права ўезду ў Еўразвяз без віз.
11 ліпеня Міністэрства эканомікі Малдовы падпісала кантракт з кансорцыумам кампаній MIC Holding LLC, Henley&Partners Holdings Ltd, Henley&Partners Government Services Ltd і Henley&Partners International Ltd. Швейцарская Henley&Partners фігуравала ў расследаванні забітай мальтыйскай журналісткі Дафны Каруаны Галіцыі.