Пуцін прызначыў Бабіча амбасадарам і сваім спецпрадстаўніком у Беларусі

Аляксандр Сурыкаў ад пасады амбасадара ў Беларусі вызвалены.

Уладзімір Пуцін прызначыў Міхаіла Бабіча амбасадарам Расеі ў Беларусі.

Адпаведны ўказ апублікаваны на Афіцыйным інтэрнэт-партале прававой інфармацыі.

Паводле інфармацыі, размешчанай на партале, Пуцін вызваліў Бабіча ад пасады паўнамоцнага прадстаўніка прэзідэнта ў Прыволжскай федэральнай акрузе. У другім указе гаворыцца, што «Бабіч Міхаіл Віктаравіч прызначаецца Надзвычайным і Паўнамоцным паслом Расейскай Федэрацыі ў Рэспубліцы Беларусь».

Бабіч таксама прызначаны спецпрадстаўніком прэзідэнта Расеі «ў развіцці гандлёва-эканамічнага супрацоўніцтва з Рэспублікай Беларусь».

Аляксандр Сурыкаў ад пасады пасла ў Беларусі вызвалены.

Інфармацыя пра тое, што Масква рыхтуе для Менска новага амбасадара, доўгі час абмяркоўвалася ў СМІ. Крыніцы расейскіх журналістаў паведамлялі, што на гэтую пасаду прадказваюць прадстаўніка прэзідэнта Расеі ў Прыволжскай федэральнай акрузе Міхаіла Бабіча. Афіцыйна гэтую інфармацыю ніхто не пацвярджаў.

Акрамя таго, гучала інфармацыя, што Бабіч можа стаць не толькі паслом, але і спецпрадстаўніком Пуціна ў Беларусі, што істотна пашырыць ягоныя абавязкі і магчымасці.

Паводле інфармацыі крыніц tut.by, цяперашні амбасадар Расеі ў Беларусі Аляксандр Сурыкаў 24 жніўня праводзіць астатнюю сустрэчу з тымі, з кім працаваў у Менску 12 гадоў.

Міхаіл Бабіч нарадзіўся ў 1969 годзе ў Разані, з 1986 да 1995 года праходзіў вайсковую службу ў ВДВ і КДБ. З 1995 да 1998 года кіраваў карпарацыяй «Антэй» у Маскве. З лістапада 2002 да лютага 2003 года быў старшынём урада Чачэніі.

Пасля звальнення ў ліпені 2016 года амбасадара Расеі Міхаіла Зурабава быў прызначаны амбасадарам ва Украіне, але Кіеў адмовіўся ўзгадніць ягоную кандыдатуру.