Financial Times: ЕЗ узмацняе барацьбу з адмываннем грошай

Гэтае пытанне будзе ўключанае ў штогадовую прамову прэзідэнта ЕК Жана-Клода Юнкера.

Брусэль імкнецца зрабіць больш жорсткімі паўнамоцтвы агенцтваў ЕЗ у барацьбе з адмываннем грошай і фінансаваннем тэрарызму.

Еўракамісія мае намер надзяліць еўрапейскі рэгулятар – Еўрапейскую банкаўскую асацыяцыю (EBA) – дадатковымі рэсурсамі для расследавання руху і адмывання крымінальных грашовых плыняў. Пра гэта паведамляе Financial Times са спасылкай на найвышэйшых чыноўнікаў ЕК (пераклад – korrespondent.net).

Таксама Еўракамісія мае намер даць нядаўна адукаванай пракуратуры ЕЗ правы на распачынанне з 2025 года справаў пра фінансаванне тэрарыстычнай дзейнасці.

Абедзве ініцыятывы для ўзмацнення паўнамоцтваў ЕЗ у барацьбе з адмываннем грошай рушылі ўслед за паведамленнямі аб тым, што за адзін год праз эстонскі філіял Danske Bank прайшло не менш за 30 мільярдаў даляраў з Расеі і іншых краінаў СНД.

На гэты момант некаторымі правамі праверкі банкаў на адмыванне грошай карыстаецца ЕЦБ. Акрамя таго, адказнасць за барацьбу з адмываннем сродкаў ляжыць большай часткай на нацыянальных рэгулятарах.

Цяпер, згодна з планамі, еўрапейская пракуратура зможа не толькі расследаваць фінансавыя злачынствы, звязаныя з выкарыстаннем бюджэтаў еўрапейскіх краінаў, але і пачынаць крымінальны пераслед.

Да цяперашняга моманту з падобнай ініцыятывай пагадзіліся 22 з 28 краінаў ЕЗ.

Для прымання канчатковай пастановы для пашырэння адказнасці двух наглядных органаў патрабуецца згода ўсіх чальцоў Звязу.

Нагадаем, у лютым 2018 года ў Латвіі паўстаў скандал вакол адмывання грошай у адным з найбуйнейшых банкаў краіны ABLV. У выніку ЗША і ЕЦБ дамагліся ягонага закрыцця, а ўлады краіны забаранілі банкам супрацоўнічаць з кампаніямі, якія не займаюцца рэальнай эканамічнай дзейнасцю.