ЗША сталі сусветным лідарам у здабычы нафты

Гэта лідарства захаваецца да канца года і ў наступным годзе.

Мінулым летам ЗША, магчыма, абышлі Расею ў аб'ёмах здабычы нафты, заняўшы першае месца ў свеце. Як паведамляе расейская служба «Галасы Амерыкі», пра гэта паведаміла міністэрства энэргетыкі ЗША.

Паводле ацэнак установы, здабыча нафты ў ЗША ў жніўні склала 10,9 мільёна барэляў у дзень у параўнанні з 10,8 мільёна барэляў у Расеі.

ЗША ўпершыню за некалькі дзесяцігоддзяў выходзяць у сусветныя лідары ў здабычы нафты.

Пад уплывам буму сланцавага бурэння, асабліва ў Пермскім басейне на захадзе Тэхаса, амерыканскія вытворцы выпампоўваюць рэкордныя аб'ёмы нафты і прыроднага газу.

Калі ўлічваць агульныя аб'ёмы здабычы нафты і газу, то ЗША з'яўляюцца сусветным лідарам з 2012 года.

Што да здабычы нафты, то ЗША абышлі Саудаўскую Арабію некалькі месяцаў таму, заняўшы другое месца пасля Расеі.

Паводле прагнозаў міністэрства энэргетыкі, дасягнутае лідарства ЗША захаваецца да канца года і ў наступным годзе.

Паводле ацэнак Расеі, яна здабывае 11,2 мільёна барэляў на дзень, але гэтая лічба ўключае кандэнсат, які здабываецца разам з нафтай.

Міністэрства энэргетыкі даўно заяўляла, што апярэджанне Расеі ў здабычы нафты Злучанымі Штатамі - гэта толькі пытанне часу.

Нягледзячы на тое, што брак трубаправодаў запавольвае тэмпы росту здабычы ў Пермскім басейне, прынамсі часова, з прагнозаў міністэрства, ЗША будуць у сярэднім здабываць 11,5 мільёна барэляў нафты на дзень у наступным годзе.

Здабыча стала хутка павялічвацца пасля таго як кошты нафты пайшлі ўверх пасля нядаўняга спаду, перавысіўшы 70 даляраў за барэль.

У мінулым годзе вытворчасць нафты ў ЗША склала ў сярэднім 9,4 мільёна барэляў на дзень.

Экспарт амерыканскай нафты таксама хутка расце, складаючы блізу 2 мільёнаў барэляў на дзень.