Сяржант з Печаў: Меркаваў, калі сума меншая, то і меншая адказнасць

У судзе паводле справы Аляксандра Коржыча прадаўжаюць дапытваць абвінавачаных.

Другі дзень пракурор задае пытанні малодшаму сяржанту Ягору Скуратовіч, піша tut.by.

Ягор з Мазыра. Да войска атрымаў сярэднюю спецыяльную адукацыю і паспеў паўгода папрацаваць. Распавядае, што паводзіў сябе з шарагоўцамі не паводле статута праз ціск сяржантаў. У сераду на судзе ён не раз паўтараў: прымушаць вайскоўцаў адціскацца, атрымліваць ад іх прадукты - у роце даўняя практыка.

- Не памятаю, што сяржанты мне казалі... «Ты, слон, а потым брыдкаслоўе» - успамінае Ягор пра тое, як старэйшыя па званні ціснулі на яго.

Са слоў Ягора, гэта яго прыніжала, у выніку яму даводзілася паступаць з вайскоўцамі, як і сяржанты.

На допытах абвінавачаных прысутнічае Святлана Коржыч, мама загінулага Аляксандра. У звароце да Скуратовіча яна абурылася: чаму лекар, якая лячыла яе сына ў медроце, цяпер у Расеі. Найлепшы армейскі сябар Сашы таксама ўцёк.

- Чаму ніхто не спрабуе іх адшукаць? - узяла слова Святлана Мікалаеўна.

- Навошта? - падхапіў яе пытанне Скуратовіч і паглядзеў на абвінавачаных у клетцы. - Тут жа трое сядзяць.

Пасля допыту дзяржабвінаваўца Юрый Шарснёў зачытаў паказанні, якія малодшы сяржант даваў падчас следства. У іх ён паведамляе, што жаўнеры плацілі яму за мабільныя, грошы ён дзяліў з Бараноўскім, адным з абвінавачаных у справе. Цяпер дзяльбу заробку Скуратовіч не прызнае.

- Я думаў: калі меншай сума выявіцца, то і адказнасць меншая, - тлумачыць ён, чаму ўзвёў паклёп на Бараноўскага.

- Сведчанні давалі добраахвотна? - удакладніў дзяржабвінаваўца.

- Так, - адказаў абвінавачаны.

У сваіх папярэдніх паказаннях Ягор успамінаў, як аднойчы да яго падышоў Бараноўскі і паведаміў: шараговец Коржыч прапанаваў 30 рублёў за тое, што яму будуць рабіць паблажкі, не прызначаць на цяжкія працы.

Бараноўскі сказаў, што палову сумы ён гатовы перадаць Скуратовічу, бо Коржыч і для Ягора быў падначаленым. Незвычайная просьба, прадоўжыў чытаць паказанні пракурор, малодшага сяржанта здзівіла, і ён асабіста ўдакладніў гэта ў Коржыча. Той усё пацвердзіў. Праўда, патрэбнай сумы ў шарагоўца не было, расплаціцца ён абяцаў пазней. Аднак, як распавёў Ягор, грошай ад Аляксандра так і не атрымаў. Ці заплаціў Саша нешта Бараноўскаму, абвінавачаны не ведае.

Таксама падчас следства Скуратовіч распавядаў, што, нягледзячы на грошы, якія Коржыч плаціў Бараноўскаму, сяржант усё адно «не пераставаў яго біць».

- Таксама Коржыч вадзіў Бараноўскага за свае грошы ў сталоўку, набываў прадукты, цыгарэты, - зачытвае паказанні Скуратовіча дзяржабвінаваўца.

Цяпер маладзён кажа, што гэтага не бачыў.

- Я меркаваў, - кажа ён.

Здагадкай называе і свой аповед пра тое, што за наведванне буфета і чайнай у роце была свая такса. Так, напрыклад, шпацыр у чайную «каштаваў» чай ці вафлі.

Як і абвінавачаны Бараноўскі, Скуратовіч напісаў некалькі прыходаў з пакаяннем. Ягор падкрэслівае: супрацоўнікі КДБ даваць паказанні не прымушалі, не білі яго. Толькі, успамінае, пакідалі надоўга, напрыклад, у кабінеце, не кармілі.

- Прапаноўвалі вады, - распавядаў раней Скуратовіч, а цяпер дапаўняе: - Яны мне дапамагалі напісаць, каб менш памылак было, а запісана па сутнасці.

Ні прозвішчаў, ні пасад супрацоўнікаў, якія яму дапамагалі, маладзён не памятае.

Падчас пасяджэння пракурор Юрый Шарснёў нагадаў, што Скуратовіч паведамляў пра сітуацыю з камандзірам роты Сукавенкам (Скуратовіч праходзіць пацярпелым паводле крымінальнай справы старэйшага лейтэнанта Сукавенкі аб не статутных узаемастасунках).

Так, напрыклад, Сукавенка выдаваў жаўнерам і сяржантам няпоўнае грашовае забеспячэнне. Замест 9 рублёў 30 капеек шарагоўцы ад яго атрымлівалі 8 рублёў 50 капеек, сяржанты замест 16 рублёў 90 капеек - 15 рублёў.

- Розніцу Сукавенка забіраў сабе, - зачытаў паказанні Скуратовіча Юрый Шарснёў і прадоўжыў, - Сукавенка штодня патрабаваў гатаваць яму каву, якую сяржанты куплялі за свае грошы. Перыядычна аглядаў тумбачкі і рэчмяшкі жаўнераў і сяржантаў, адбіраў прадукты для сябе асабіста. Каб вайскоўцы маглі пайсці ў звальненне, камандзірам заахвочвалася «здабыча» розных матэрыяльных каштоўнасцяў. Так, шараговец Ш. прынёс у роту выкрадзены шлемофон са склада.

Пасля чаго, прадоўжыў дзяржабвінаваўца, Сукавенка хацеў яго заахвоціць.

- Паведамлялі такія факты? - удакладніў пракурор.

- Паведамляў.

- Ці адпавядаюць яны рэчаіснасці?

- Адпавядаюць, - пацвердзіў абвінавачаны.