Ураган «Флорэнс» усутыч наблізіўся да ўзбярэжжа ЗША
3- 14.09.2018, 14:35
- 15,899
Дзясяткі тысяч дамоў засталіся без электрычнасці на ўсходнім узбярэжжы ЗША.
Ураган па меры прасоўвання да мацерыка аслабеў да першай катэгорыі паводле шкале Сафіра - Сімпсана (з пяці магчымых, дзе пятая - максімальная), цяпер хуткасць ветру ў эпіцэнтры ўрагану складае 150 км на гадзіну, паведамляе расейская служба BBC.
Небяспека не мінула
Аднак, як папярэджваюць метэаролагі і мясцовыя ўлады, нельга казаць пра тое, што небяспека абмінула. Вялікая колькасць ападкаў, якую нясе з сабой ураган, можа прывесці да катастрафічных наступстваў.
Раніцай у пятніцу ўраган ушчыльную падышоў да ўзбярэжжа штатаў Паўночная і Паўднёвая Караліна. У прыбярэжных гарадах штата марская вада затапіла некаторыя вуліцы. Улады штатаў папярэджваюць, што ёсць рызыка ўзнікнення «катастрафічнай паводкі», якая, у сваю чаргу, можа прывесці да гібелі людзей. Паводле звестак метэаролагаў, у найбліжэйшыя два-тры дні ў Паўночнай Караліне выпадзе 8-месячная норма ападкаў.
«Флорэнс» імкліва набліжаецца да Караліны
Паводле прагнозу метэаролагаў, ураган «Флорэнс» дасягне ўзбярэжжа Паўночнай Караліны апоўдні паводле мясцовага часу ў пятніцу.
Чакаецца, што з раёнаў, якія знаходзяцца ў зоне рызыкі, будуць эвакуяваныя больш за мільён чалавек.
Губернатар штата падкрэсліў, што ва ўладаў і жыхароў рэгіёну быў час на тое, каб ужыць неабходныя захады, і час яшчэ застаецца на гэта.
Катастрафічная паводка
Надвор'е ў Паўночнай і Паўднёвай Караліне значна пагоршылася ў чацвер. У некаторых раёнах Паўночнай Караліны ўсяго за некалькі гадзін выпала амаль 30 см ападкаў.
Цяпер ураган «Флорэнс» рухаецца ў паўночна-заходнім кірунку. Паводле звестак сіноптыкаў, шторм прадоўжыць павольна прасоўвацца ўздоўж усходняга ўзбярэжжа ЗША ў пятніцу і суботу, увесь гэты час у прыбярэжных раёнах будуць ісці праліўныя дажджы.
У Нацыянальным цэнтры вывучэння ўраганаў папярэдзілі, што высокая імавернасць «штармавога падвышэння ўзроўню вады» ў прыбярэжных раёнах штатаў Паўночная і Паўднёвая Караліна. Сіноптыкі адзначаюць, што штармавы прыліў і моцны вецер могуць выклікаць моцнае затапленне прыбярэжных тэрыторый.
У чацвер а 23:00 паводле мясцовага часу (03:00 паводле Грынвіча) Нацыянальны цэнтр вывучэння ўраганаў заявіў, што ўраган «Флорэнс» аслабеў да першай катэгорыі (з пяці магчымых). Раней сіла ўрагану ацэньвалася ў чатыры балы.
У цэнтры адзначаюць, што, нягледзячы на тое, што сіла ўрагану знізілася, ён застаецца даволі небяспечным праз аб'ём ападкаў, якія ён нясе з сабой.
У 2017 годзе ЗША панеслі рэкордныя страты ад стыхійных бедстваў
«Паводкі, да няшчасця, прыводзяць да гібелі людзей, і, мабыць, менавіта з гэтым мы і можам сутыкнуцца», - сказаў Брок Лонг, кіраўнік Федэральнага агенцтва надзвычайных сітуацый (FEMA).
З ягоных слоў, найбольшую рызыку зазнаюць тыя жыхары, дамы якіх размешчаныя блізу рэк, ручаёў і ў нізіне.
Паводле прагнозаў метэаролагаў, шторм яшчэ больш аслабне да моманту, калі ён дасягне ўзбярэжжа. Пры гэтым ён прынясе з сабой велізарную колькасць ападкаў.
Як папярэджваюць метэаролагі, у некаторых раёнах узровень вады можа падняцца да 4 метраў, рэкі могуць выйсці з берагоў.
У некаторых раёнах Паўночнай Караліны выпадзе 50-70 см ападкаў.
Больш за 100 тысяч жыхароў ужо засталіся без электрычнасці, але, як папярэджваюць энэргетыкі, калі сітуацыя пагоршыцца, без электраэнэргіі могуць застацца амаль тры мільёны дамоў і кампаній.
Паводле звестак сайта FlightAware.com, скасаваныя амаль 1400 авіярэйсаў. Праца многіх аэрапортаў, размешчаных на ўсходнім узбярэжжы краіны, прыпыненая праз набліжэнне ўрагану.
Берагавая ахова ЗША падрыхтавала катэр на выпадак неабходнасці весці выратавальныя працы на вадзе.
На дапамогу ратавальнікам у Паўночнай і Паўднёвай Караліне прыбылі іх калегі з іншых штатаў.
Больш за мільён жыхароў павінны пакінуць узбярэжжы штатаў Вірджынія, Паўночная і Паўднёвая Караліна, блізу 12 тысяч чалавек размешчаныя ў спецыяльных часовых цэнтрах.