Леанід Кулакоў прымусіў адміністрацыю Лукашэнкі адказаць аб «справе прафзвязаў»

Адміністрацыя дыктатара адказвае актывістам нібы пад капірку.

Адміністрацыя Лукашэнкі адказала на зварот актывіста грамадзянскай кампаніі "Еўрапейская Беларусь" Леаніда Кулакова аб спыненні крымінальнага пераследу лідараў прафзвязу РЭП Генадзя Фядыніча і Ігара Комлік, піша сайт praca-by.info.

Раніцай 24 жніўня, у дзень вынясення судом Савецкага раёна Менска прысуду паводле "справы прафзвязаў", да прыёмнай адміністрацыі кіраўніка прыйшло некалькі дзясяткаў чалавек. Яны перадалі ў прыёмную звароты, у якіх адзначалі беспрэцэдэнтны ціск на сябраў прафзвязу РЭП і прасілі спыніць крымінальны пераслед яго кіраўнікоў.

У адказе Леаніду Кулакову за подпісам начальніка галоўнай управы працы са зваротамі грамадзян Рыгора Шлыка адзначана наступнае:

“Службовыя асобы адміністрацыі прэзідэнта не маюць права даваць ацэнку пастановам, якія прымаюцца судамі, касаваць іх ці пераглядаць, а ў адпаведнасці з артыкулам 110 Канстытуцыі РБ якое-небудзь умяшанне ў дзейнасць суддзяў у выкананні правасуддзя недапушчальнае і накладае адказнасць паводле закону".

Аналагічныя адказы, нібы напісаныя пад капірку, атрымалі і іншыя заяўнікі, у прыватнасці актывіст з Мазыра Уладзімір Неўмяржыцкі і актывістка грамадзянскай кампаніі “Еўрапейская Беларусь” Мая Навумава.