Нямеччына стала партнёрам ініцыятывы Трохмор’я
- 19.09.2018, 12:13
- 7,165
Амбіцыйны праект ахоплівае краіны Балтыйскага, Чорнага і Адрыятычнага мораў.
Па выніках саміту ініцыятывы Трохмор’я, які адбыўся 17 верасня ў Бухарэсце, Нямеччына атрымала статус генеральнага партнёра праекта.
Пра гэта піша "Еўрапейская праўда" са спасылкай на News.ro.
"Пэўным вынікам з'яўляецца пастанова прыняць Нямеччыну як генеральнага партнёра ў ініцыятыве", - сказаў прэзідэнт Румыніі Клаўс Ёханіс.
Паводле ягоных слоў, Нямеччына мае эканамічныя інтарэсы ў рэгіёне.
Лідары краін-удзельніц праекта таксама дамовіліся стварыць фонд Трохмор’я з капіталам на 5 млрд еўраў для падтрымкі рэгіянальных інвестыцыйных праектаў, піша Polskie Radio 24. Некаторыя інвестыцыі ўжо пачатыя, напрыклад, дарога Via Carpatia.
На сустрэчах прысутнічаў міністр энэргетыкі ЗША Рык Пэры. "Я размаўляў з ім пра важнасць дасягнення рэальнай дыверсіфікацыі, незалежнасць Еўропы, з асаблівым упорам на Цэнтральную Еўропу, ад расейскага газу", - заявіў прэм'ер Польшчы Матэвуш Маравецкі.
ЗША імкнуцца да павелічэння амерыканскага экспарту ЗПГ на замежныя рынкі, з чым наўпрост звязаная палітыка падтрымкі еўрапейскай незалежнасці.
Наступны саміт Трохмор’я адбудзецца ў 2019 года ў Славеніі.
Праект аб'ядноўвае 12 краін Цэнтральнай і Усходняй Еўропы, размешчаных у рэгіёне паміж Балтыйскім, Чорным і Адрыятычным морамі: чатыры краіны Вышаградскай групы, краіны Балтыі, Аўстрыю, Харватыю, Румынію, Славенію і Балгарыю. Першачарговымі сферамі паглыблення супрацоўніцтва выбраны энэргетыка, транспарт і тэлекамунікацыі.