Джым Мэціс зняпраўдзіў чуткі пра ягоную будучую адстаўку

Кіраўнік Пентагона заклікаў не ўспрымаць чуткі ўсур'ёз.

Міністр абароны ЗША Джым Мэціс катэгарычна адхіліў здагадкі, што ён можа пакінуць адміністрацыю прэзідэнта Дональда Трампа ў найбліжэйшыя месяцы, піша «Голас Амерыкі».

«Я б не ўспрымаў гэта сур'ёзна, - заявіў ён у гутарцы з журналістамі ў Пентагоне. - Колькі разоў мы ўжо праходзілі праз гэта, з таго часу, як я тут? Неўзабаве ўсё ўляжацца, і людзі, якія запусцілі гэты слых, змогуць складаць новы».

«Так працуе гэты горад, - дадаў ён. - Стаўцеся да гэтага з гумарам».

Гэта быў самы адкрыты каментар Мэціса на сёння ў сувязі з ўзмацненнем чутак з нагоды магчымых перастановак у кабінеце Трампа пасля прамежкавых выбараў у Кангрэс, якія адбудуцца ў лістападзе.

У апошнія тыдні Мэціс патрапіў у цэнтр увагі СМІ, асабліва пасля публікацыі кнігі журналіста-даследчыка Боба Вудварда раней у гэтым месяцы, паводле якой Мэціс дапускаў грэблівыя выказванні пра Трампа ў прыватных размовах з калегамі.

Мэціс катэгарычна адмаўляе, што ён дапускаў такія рэмаркі. Трамп 5 верасня заявіў, што міністр абароны прадоўжыць сваю працу.

«Ён застанецца тут, - падкрэсліў прэзідэнт. - Мы вельмі задаволеныя ім. Мы атрымлівалі мноства перамог».

Аднак газета New York Times паведаміла 15 верасня, што Трамп «пакрыўдзіўся на міністра абароны праз стомленасць ад нязручных параўнанняў з Мэцісам, якога называюць дарослым чалавекам у пакоі».

Газета таксама адзначыла з'яўленне ў Белым доме раней сёлета Міры Рыкардэл, якая заняла ўплывовую пасаду намесніцы дарадцы ў нацыянальнай бяспецы. Цяперашнія і былыя чыноўнікі паведамілі Reuters, што яна недалюблівае Мэціса.

Адстаўны генерал Корпуса марской пяхоты, Мэціс сышоў са службы ў 2013 годзе і прыступіў да працы ў Стэнфардскім універсітэце.

На слуханнях у Сенаце, прысвечаных ягонаму зацвярджэнню летась, ён сказаў, што «атрымліваў асалоду ад жыцця на захад ад Скалістых гор», калі да яго паступіў званок з прапановай заняць пасаду кіраўніка Пентагона.

Пасля таго, як ён адказаў на пытанні пра сваю будучыню, Мэціса спыталі, ці задумваўся ён пра сваё жыццё пасля Пентагона.

«Вядома ж, я не думаю аб сыходзе. Мне тут падабаецца, - жартам адказаў ён. - Я думаю выйсці на пенсію проста тут. Прыгледжу сабе якое-небудзь мястэчка на берагах Патамака».