«Гэта маё другое дыханне»: Віталь Гуркоў адкрыў уласны баксёрскі клуб

Народны чэмпіён там будзе асабіста трэніраваць беларусаў.

Сёння самы вядомы баец краіны шматразовы чэмпіён свету і прызёр прэстыжных прэмій у свеце Віталь Гуркоў стаў на цярністую сцежку бізнэсу і адкрыў уласны баксёрскі клуб. Аднак з вялікага спорту Віталь сыходзіць не плануе - проста пашырае гарызонты. У новай зале спартовец будзе асабіста трэніраваць баксёраў-пачаткоўцаў і дзяліцца досведам з простым беларусам. Трапіць да яго нескладана - трэба толькі паспець, піша onliner.by.

Невялікае памяшканне знаходзіцца на Мяснікава, 78. Раней тут размяшчалася іншая спартовая зала, але праіснавала зусім нядоўга: падыход быў не той.

- Асаблівых праблем з заламі ў Менску няма - яны на кожным кроку. Пытанне толькі ў тым, што ў кожнай зале вісяць баксёрскія грушы, а трэніруе на іх і жук і жаба. Я ж сабраў каманду прафесійных трэнераў і спартоўцаў, якія ведаюць, што робяць, - распавядае Гуркоў.

Перабудоўваць у памяшканні давялося практычна ўсё. Спартовец тлумачыць, што прастора выкарыстоўвалася зусім нерацыянальна і была парадкам захламленая. Цяпер жа ўсё рацыянальна.

Перад адкрыццём лідскі мастак Сяргей Русак намаляваў на сцяне невялікія графіці, кіеўскі таварыш Гуркова распісаў рынг беларускімі фразамі, на сценах з'явіліся палотны з выступаў «Брута» і баёў Віталя.

- Думаю, у панядзелак мы пачнём набіраць групы. Трэніраваць будзем звычайных людзей, не прафесіяналаў. Мы чакаем хлопцаў, якія хацелі займацца, але заўсёды нешта перашкаджала. Тут яны змогуць стаць больш упэўненымі, мацнейшымі, папрацаваць над целам і духам. Хутчэй, нават над духам. Арыентавацца будзем менавіта на індывідуальныя заняткі, заняткі ў малых групах. Сам я буду трэніраваць адну групу на дзень, каб не распыляцца занадта моцна - наперадзе яшчэ шмат спартовых падзей.

Сам Гуркоў таксама будзе трэніравацца ва ўласнай зале. У вызначаныя гадзіны навабранцы змогуць займацца паралельна з гуру.

Найбліжэйшым часам абвесцяць набор у дзіцячую групу. Іх трэніроўкі будуць праводзіцца на бясплатнай аснове.

- Будзе невялікая група для дзяцей 7-14 гадоў. З імі будуць займацца заслужаныя майстры, прафесіяналы сваёй справы. Асабіста я на сябе пакуль такую адказнасць узяць не магу: у мяне бываюць спаборніцтвы, паездкі, а дзеці прывыкаюць да аднаго чалавека і перабудавацца часам вельмі складана. Асаблівага адбору не будзе: каб запісацца, трэба проста прынесці даведку ад педыятра, якая даводзіць адсутнасць супрацьпаказанняў, - тлумачыць спартовец.

- Людзям можа здацца, што гэта такі клуб сябе любімага, але мне гэта месца было патрэбнае. Я доўгі час займаўся ў падвалах, а хацелася светлага прасторнага памяшкання. Мне патрэбен быў уласны працоўны стол з кампутарам - вось я яго і паспрабаваў арганізаваць. Трэба ж з чагосьці пачынаць.

Магчыма, з часам зраблю залу большую або адкрыю іншы. З аднаго боку, гэта досвед вядзення бізнэсу, з другога - зала для сябе самога. Гэта маё другое дыханне. Гэта дазволіць лішні раз завастрыць увагу на ўласнай працы, паглядзець на сябе з іншага ракурса.

Сёння вечарам тут будзе невялікая ЗЛЖ-вечарына. Прыйдуць спартоўцы, выступіць Naviband, сустрэнуцца сябры, знаёмыя і прыхільнікі. Паказальных выступаў, трэніровак і спарынгаў не будзе: Віталь ўважае такія мерапрыемствы за паказуху, якая сябе зжыла. «Быццам чыноўнік прыехаў, і ўсім трэба прыгожа грушу дубасіць - мяне гэта ўсё толькі нервуе».

Пакуль заняткі ў новым клубе будуць праводзіцца толькі ўранку і ўвечары тры разы на тыдзень, пазней графік можа быць зменены. Запісацца можна проста пад'ехаўшы асабіста або звярнуўшыся ў сацыяльных сетках. 1,5 гадзінны занятак будзе каштаваць 25 рублёў, абанемент на восем заняткаў - 190 рублёў.