Жырыноўскага падазраюць у фінансаванні «ДНР» і «ЛНР»

Ва Украіне палітыку пагражае тэрмін ад 10 да 12 гадоў пазбаўлення волі.

Шаўчэнкаўскі раённы суд Кіева даў дазвол на спецыяльнае дасудовае расследаванне ў крымінальнай вытворчасці ў дачыненні да лідара ЛДПР Уладзіміра Жырыноўскага і яшчэ двух дэпутатаў Дзярждумы РФ. Адпаведнае хадайніцтва боку абвінавачвання суд задаволіў 18 верасня, паведамляе прэс-служба Генпракуратуры Украіны ў пятніцу, 21 верасня.

Жырыноўскага і двух іншых дэпутатаў падазраюць у фінансаванні дзейных на ўсходзе Украіны «ЛНР» і «ДНР», якія ў Кіеве прызнаныя тэрарыстычнымі арганізацыямі. Паводле Крымінальнага кодэксу Украіны, вінаватаму ў такім злачынстве можа пагражаць тэрмін ад 10 да 12 гадоў пазбаўлення волі з канфіскацыяй маёмасці.

Паводле версіі Генпракуратуры, лідар ЛДПР у сакавіку - красавіку 2014 года стварыў і ўзначаліў групу, якая праводзіла збор грашовых сродкаў для самаабвешчаных «ЛНР» і «ДНР». У яе ўвайшлі сябры ЛДПР, у тым ліку кіраўнікі і прадстаўнікі рэгіянальных аддзяленняў партыі, а таксама іншыя дэпутаты Дзярждумы, гаворыцца далей у паведамленні. Між іншым, пры садзейнічанні прадстаўнікоў «ДНР» на сайтах ЛДПР з'явіліся абвесткі пра збор сродкаў, а на тэрыторыі Расеі былі адкрыты пункты збору, гаворыцца ў паведамленні Генпракуратуры.

Дэпутаты заключылі пагадненне з «ДНР» пра яе матэрыяльнае забеспячэнні і выдалі сепаратыстам памяшкання ў Маскве «для прадстаўнічай дзейнасці», уважаюць у Кіеве.

За кошт сабраных сродкаў, а таксама асабістых сродкаў і маёмасці група пад кіраўніцтвам Жырыноўскага «на просьбу кіраўніка тэрарыстычнай групы «Самалі» Міхаіла Талстых (пазыўны «Гіві»)» паставіла сепаратыстам з 2014 да 2017 год шэсць «транспартных сродкаў расейскай вытворчасці з падвышанымі прахаднымі і эксплуатацыйнымі магчымасцямі», паведамляе Генпракуратура, адзначаючы, што некаторыя з іх былі задзейнічаны пры здзяйсненні тэрактаў супраць украінскіх падраздзяленняў, між іншым на тэрыторыі Данецкага аэрапорта.

Ведамства нагадвае, што Жырыноўскі падпадае пад санкцыі Еўразвязу Канады, Аўстраліі і Швейцарыі, уведзеныя ў дачыненні да РФ за садзейнічанне ў дэстабілізацыі сітуацыі ва Украіне і акупацыі паўвострава Крым. Жырыноўскаму таксама забаронены ўезд ва Украіну.