Лукашэнка: Трэба закрыць мяжу з Украінай

Дыктатар вырашыў павялічыць колькасць памежнікаў.

У Беларусі абмяркоўваецца пытанне павелічэння колькасці памежнікаў. «Памежныя войскі павінны функцыянаваць, і эфектыўна. Трэба павысіць - павысім, але бяздумнага такога падвышэння быць не павінна», - сказаў Лукашэнка на сустрэчы з дзяржаўным сакратаром Рады бяспекі Станіславам Засем і старшынём Дзяржаўнага памежнага камітэта Анатолем Лапо ў панядзелак.

Словы Лукашэнкі прыводзіць дзяржаўнае агенцтва БелТА.

«Там, дзе трэба, мы гэта зробім. Мы прынялі пастанову аб умацаванні мяжы з Украінай. Мы бачым, колькі адтуль ідзе сёння бяды для Беларусі, і ў тым ліку зброі перапраўляецца. Мы павінны закрыць мяжу. Але не для прыстойных людзей, а для бандытаў, для тых, хто вязе зброю», - заявіў Лукашэнка.

Лукашэнка згадаў пра нядаўні выпадак затрымання чалавека з цэлым арсеналам зброі: «кулямёты, дзясятак аўтаматаў, два дзясяткі вінтовак, дзесяць тысяч патронаў і гэтак далей, і гэтак далей».

«Адкуль усё гэта? Паглядзелі - у войску нашым усё на месцы. Завезлі. Таму прынятая пастанова ўсталяваць мяжу з Украінай. Патрэбна там падмацаванне - патрэбна. Давайце паглядзім. Але не кагалам - туды сотню, туды тысячу, а па аднаму чалавеку, куды трэба. Без усялякіх начальнікаў. Начальнікаў павінна быць па мінімуму», - паведаміў ён.

«Сённяшняе пытанне як раз сыходзіць каранямі ў той аналіз, які мы ажыццяўлялі тады на мяжы. І тады гаворка ішла ў тым ліку пра нейкую мадэрнізацыі памежных войскаў, у тым ліку і па колькасці, стварэнні новых падраздзяленняў у сувязі з тым, што нам даводзіцца закрываць украінскую мяжу прыстойна. І больш эфектыўна працаваць у іншых кірунках», - адзначыў Лукашэнка.