Расейскія памежнікі зладзілі правакацыі каля Марыупаля
1- 25.09.2018, 12:20
- 16,755
Правакацыі былі спыненыя дзеяннямі ўкраінскага флоту.
ВМС Украіны паведамілі пра спробы правакацый з боку расейскіх памежнікаў паблізу Марыупаля.
Як паведамілі ВМС, паблізу рэйду Марыупаля ў раёне якарнай стаянкі была спроба правакацыі з боку расейскага памежнага катара тыпу Мангуст, які нядаўна ўжо небяспечна манеўраваў побач з украінскім катарам Марской аховы, паведамляе nv.ua.
"Памежны катэр РФ на вялікай хуткасці спрабаваў зблізіцца з нашымі караблямі, але рашучымі актыўнымі дзеяннямі экіпажаў малых браняваных артылерыйскіх катараў Лубны і Крэменчуг ён быў спынены і не дапушчаны да месца стаянкі пошукава-выратавальнага судна Данбас і марскога буксіра Карэц", - заявілі ў ВМС.
У прэс-службе ВМС дадалі, што некаторыя сродкі масавай інфармацыі пачалі распаўсюджваць чарговы фэйк расейскай прапаганды пра нібыта аплату лоцманскіх паслуг краіне-агрэсарцы: ніякай аплаты лоцманскіх паслуг пры праходжаннi праз Керчанскую пратоку не было.
Нагадаем, 25 верасня, два караблі ВМС Украіны (Данбас і Карэц) прыбылі ў Бярдзянск.
23 верасня судны Данбас і Карэц прайшлі мост, які злучае Таманскую паўвыспу і акупаваны Крым (так званы Крымскі мост), а на наступны дзень прыбылі ў горад Бярдзянск.
Шлях з Чорнага ў Азоўскае мора праходзіць праз фактычна кантраляваную РФ Керчанскую пратоку. Аднак у адпаведнасці з пагадненнем ад 2003 года, цывільныя і вайсковыя судны пад сцягамі Украіны і РФ могуць бесперашкодна праходзіць праз пратоку і ісці ў свае парты.
У апошнія месяцы Расея ажыццяўляла рэгулярныя спробы пашырыць зону свайго ўплыву ў Азоўскім моры, блакуючы і затрымліваючы ўкраінскія караблі.