У Беларусі з 1 студзеня з'явіліся нябачаныя дарожныя знакі

Тыя, хто адважацца сёння раніцай сесці за стырно, могуць сустрэць на дарозе шмат новага.

Калі зімовай раніцай вы прачняцеся, каб сесці ў аўтамабіль і адправіцца аддаваць візіты ветлівасці сябрам і сваякам, не палохайцеся: на дарогах могуць стаяць нябачаныя дагэтуль новыя знакі, піша abw.by.

Справа ў тым, што з 1 студзеня 2019 года ў СТБ 1300-2014 «Тэхнічныя сродкі дарожнага руху. Правілы выкарыстання» ўступаюць у дзеянне змены. Раскажам пра найважнейшыя.

Знаёмцеся: «мама з дачкой» (або «шатландзец з сынам»). З 1 студзеня 2019 года пры скрыжаванні вуліцы або дарогі такая таблічка можа вітаць пешаходаў. Такім будзе знак дадатковай інфармацыі (таблічка), які можа ўсталёўвацца на пешаходных пераходах паблізу школ, дзіцячых дашкольных устаноў і ўстаноў аховы здароўя і размяшчацца асабовым бокам да пешаходаў.

Напэўна, улічваючы спрэчкі, якія ўзнікаюць паміж веласіпедыстамі і пешаходамі, унеслі змены ва ўстаноўку адпаведных знакаў.

Дапускаецца на ўзгадненне з ДАІ выкарыстанне існых ходнікаў для роварнага руху шляхам пазначэння на тратуары пешаходнай і веласіпеднай дарожак з выкарыстаннем разметкі 1.1. Пры гэтым павінна забяспечвацца мінімальная шырыня праезнай часткі:

для пешаходнага руху - не менш за 1,5 м;

для роварнага руху ў адным кірунку - не менш за 1,75 м, у двух кірунках - не менш за 2,5 м.

Разбярыцеся цяпер, у пешаходаў перавага перад веласіпедыстамі ці наадварот. Вось толькі цікава, а ці законна дзецям рухацца на двух- (да пэўнага ўзросту) і трохколавых дзіцячых роварах па тратуары (для пешаходаў) і ці будзе гэта ўважацца за парушэнне?

Для абазначэння населеных пунктаў сельскага тыпу, акрамя аграгарадкоў, павінны выкарысьтоўцацца знакі 5.22.1.

Хутчэй за ўсё, эканамічна неапраўдана ўсталёўваць «вялікія знакі» 5.22.2 для абазначэння вёсак.

Дапоўненыя СТБ знакамі (з правіламі ўстаноўкі), якія тычацца платных дарог.

І наперад, у будучыню - з'явіліся знакі АЗС са станцыямі для зарадкі.

З «электрасферы» і новыя таблічкі 7.4.9 і 7.25.

Што яшчэ новага мы ўбачым на дарогах? На адрэзках, дзе ПДР устаноўленае абмежаванне максімальнай хуткасці 20 км/г (у жылых зонах, дваровых і прылеглых тэрыторыях), знак 1.16.1 «Штучная няроўнасць» дапускаецца не ўсталёўваць і адпаведную разметку не наносіць.

Таксама СТБ дапоўнены раздзелам «Дарожныя люстэркі». Люстэркі могуць усталёўвацца на адцінках дарог, дзе адлегласць падоўжнай і папярочнай бачнасці меншая за нарматыўнае значэнне.

Але самы надзённы і важны дадатак да стандарту - гэта ўрэгуляванне выкарыстання знака RADAR. Знак 1.36 «Кантроль рэжыму руху» павінен усталёўвацца ў месцах эксплуатацыі спецыяльных тэхнічных сродкаў, якія працуюць у аўтаматычным рэжыме і маюць функцыі фота- і кіназдымкі, відэазапісу. Знак 1.36 павінен усталёўвацца за населеным пунктам на адлегласці 150-300 м да месца ўсталявання спецыяльных тэхнічных сродкаў, а ў населеных пунктах - на адлегласці 50-100 м.

У месцах эксплуатацыі стацыянарных спецыяльных тэхнічных сродкаў прадугледжваецца ўсталяванне сталых дарожных знакаў, у месцах выкарыстання мабільных спецыяльных тэхнічных сродкаў - часовых знакаў на пераносных стойках.

І галоўнае - на адцінках дарог з раздзяляльнай паласой знак павінен дублявацца на падзяляльнай паласе! Дарэчы, мы пісалі пра тое, што адсутнасць дублявання знака RADAR на буйных аўтамагістралях ставіць удзельнікаў руху ў няроўнае становішча. Цяпер сітуацыя выпраўленая, і гэта выдатная навіна!

Прыемных падарожжаў! І не парушайце.