Міграцыйныя паказчыкі Літвы - найлепшыя з пачатку сяброўства ў ЕЗ
3- 11.01.2019, 16:10
- 9,442
У Літву ў 2018 годзе прыбыло амаль 29 тысяч чалавек.
Паводле афіцыйных звестак, летась з Літвы выехалі больш 32,2 тысячы жыхароў, з іх амаль 29 тысяч літоўскіх грамадзян, піша delfi.lt.
У асноўным эмігравалі ў Злучанае Каралеўства, Нямеччыну, Нарвегію і Ірландыю. У Літву ў 2018 годзе прыбыло 28,9 тысяч чалавек, з іх 16,6 тысяч - грамадзяне Літвы. Часцей за ўсё замежнікі ў Літву імігравалі з Украіны, Беларусі ды Расеі.
Усё ж Літва застаецца адзінай краінай Балтыі, дзе міграцыйныя паказчыкі застаюцца адмоўнымі. У Эстонію ўжо некаторы час прыбывае больш жыхароў, чым выязджае, а ў Латвіі летась міграцыйныя лічбы былі «нулявымі».
Пазалетась з Літвы эмігравалі больш 47,9 тысячы чалавек, а імігравалі амаль 20,4 тысячы асоб. Агулам Літва летась пазбавілася 14,9 тысячы жыхароў, найбольшы паўплываў на гэты працэс адмоўны натуральны прырост насельніцтва. У 2018 годзе ў краіне нарадзілася 28,2 тысячы немаўлят, што амаль на паўтары тысячы менш, чым у пазамінулым годзе.
Летась у Літве памерлі 39,8 тысячы чалавек - амаль на 300 менш, чым у 2017 годзе. Паводле афіцыйнай статыстыкі, агулам напачатку года ў Літве пражывала 2 млн 794 тысячы чалавек.