Кітайскі бізнэсовец арыштаваны ў Польшчы праз падазрэнне ў шпіянажы

Арыштаваны бізнэсовец з КНР працуе ў буйной тэлекамунікацыйнай кампаніі.

У Польшчы праз падазрэнне ў шпіянажы арыштаваны бізнэсовец з Кітая, абвясціла ў пятніцу, 11 студзеня, Агенцтва ўнутранай бяспекі краіны. Акрамя таго ордар на арышт выдадзены ў дачыненні да польскага грамадзяніна. Абодвух падазраюць у супрацоўніцтве з кітайскай выведкай і ў нанясенні шкоды Польшчы, піша «Немецкая волна».

Грамадзянін Кітая - бізнэсовец, «які працуе ў буйной тэлекамунікацыйнай кампаніі», заявіў Мацей Вонсік, намеснік каардынатара польскіх спецслужбаў ва ўрадзе. Паводле звестак мясцовых СМІ, гаворка ідзе пра аднаго з дырэктараў польскага філіяла кампаніі Huawei Вэйцзіне В. Грамадзянін Польшчы Пётр Д. працаваў кансультантам кібербяспекі ў мясцовым філіяле французскага мабільнага аператара Orange, да гэтага быў штатным супрацоўнікам польскай спецслужбы. У офісах Orange і Huawei Technologies ужо прайшлі ператрусы, паведамляе тэлеканал TVP.

У пачатку снежня ў Канадзе на запыт Вашынгтона была арыштаваная Мэн Ваньчжоў - дачка заснавальніка Huawei і адна з віцэ-старшыняў кампаніі. Яе падазраюць у парушэнні гандлёвых санкцый, уведзеных ЗША супраць Ірана. Пазней Мэн адпусцілі з-пад варты пад заклад сумай у 7,5 млн даляраў (6,6 млн еўраў).