Мэр Гданьска памёр у лякарні пасля нажавых раненняў
- 14.01.2019, 16:54
- 28,528
ФОТА: RENATA DĄBROWSKA
Лекары змагаліся за жыццё польскага палітыка ўсю ноч.
Мэр Гданьска Павел Адамовіч памёр - сказаў лекар гданьскай лякарні, паведамляе RMF24.
Лекары змагаліся за жыццё польскага палітыка ўсю ноч. Паўлу Адамовічу было 54 гады. Ён займаў пасаду мэра Гданьска 20 гадоў.
Свае спачуванні родным і блізкім Паўла Адамовіча выказаў прэзідэнт Польшчы Анджэй Дуда:
«Не стала Паўла Адамовіча. Я далучаюся да смутку і малітвы з ягонымі самымі блізкімі сябрамі і ўсімі людзьмі добрай волі. Я прашу Бога аб падтрымцы ягонай сям'і. Варожасць і гвалт прынеслі самы трагічны вынік і боль. Мы не можам прыняць гэта», - заявіў прэзідэнт Польшчы.
Pan Prezydent Paweł Adamowicz odszedł. Łączę się żalu i modlitwie z Jego Najbliższymi, Przyjaciółmi i wszystkimi Ludźmi dobrej woli. Proszę Pana Boga o wsparcie dla Rodziny Zmarłego.
— Andrzej Duda (@AndrzejDuda) 14 января 2019 г.
Wrogość i przemoc przyniosła najtragiczniejszy skutek i ból. Nie wolno nam się z tym pogodzić.
Нагадаем, учора Паўла Адамовіча шпіталізавалі ў цяжкім стане пасля таго, як невядомы мужчына напаў на яго з нажом на сцэне падчас дабрачыннага канцэрту, які праходзіў у польскім Гданьску.
Мужчына выбег проста на сцэну, дзе ў гэты час знаходзіўся Адамовіч і некалькі разоў ударыў мэра нажом.
Мэра адвезлі ў клінічную лякарню медыцынскага ўніверсітэта Гданьска ў крытычным стане. Высветлілася, што нападнік трапіў нажом у сэрца.
