Страйк ахапіў восем аэрапортаў Нямеччыны
- 15.01.2019, 9:18
- 7,946
У выніку страйку адкладзеныя сотні рэйсаў з удзелам 220 тысяч пасажыраў.
Адразу восем аэрапортаў Нямеччыны ў аўторак, 15 студзеня ахопленыя страйкам 23 тысяч супрацоўнікаў сферы гарантавання бяспекі аэрапортаў, які праводзіцца на прызыў найбуйнейшага нямецкага прафаб'яднання Verdi, паведамляе dw.com.
Апоўначы страйк пачаўся ў Гамбургу, Гановеры і Брэмене. У Франкфурце-на Майне персанал, які адказвае за бяспеку аэрапорта, спыніў працу з 2:00 да 20:00, у Дрэздэне - з 3:00 да 21:00, у Мюнхене з 3:30 да 24:00, у аэрапорце Лейпцыг/Хале - з 4:00 да 18:00 і ў Эрфурце - з 6:00 да 22:00.
У сувязі са страйкам у Нямеччыне расейская авіякампанія «Аэрафлот» 15 студзеня скасавала 4 рэйсы з Масквы ў Франкфурт-на-Майне, паведаміла напярэдадні прэс-служба возніка. Пасажыры будуць адпраўленыя наступнымі рэйсамі з Франкфурта і іншых аэрапортаў Нямеччыны сеткі маршрутаў «Аэрафлота», гаворыцца ў паведамленні.
Адзін з самых маштабных страйкаў працоўных у Нямеччыне
Цяперашні страйк у аэрапортах - адзін з самых маштабных у краіне. «Сетка паветраных злучэнняў Нямеччыны можа быць у гэты дзень паралізаваная», - папярэджвае Аб'яднанне нямецкіх грамадзянскіх аэрапортаў ADV.
Паводле звестак арганізацыі, ад страйку пацярпяць як мінімум 220 000 авіяпасажыраў. У адным толькі Франкфурце-на-Майне, дзе акцыю падтрымаюць 5000 супрацоўнікаў, адказных за кантроль пасажыраў і грузаў, будуць скасаваныя 570 з запланаваных за 1200 рэйсаў прылёту і вылету, паведамляе прэс-служба прадпрыемства эксплуатацыі Fraport.
Прафзвяз Verdi дамагаецца падвышэння заробку да 20 еўраў за гадзіну для 23 тысяч работнікаў, якія адказваюць за бяспеку ў аэрапортах. Працадаўца ўважае гэтае патрабаванне за празмернае.