Будаўнік з Бабруйска: У нашым трэсце квітнее махлярства

Бабруец распавёў пра шэраг парушэнняў на будаўнічым прадпрыемстве.

У рэдакцыю сайта Charter97.org звярнуўся чытач з Бабруйска, які распавёў аб парушэннях на будаўнічым прадпрыемстве:

«Будаўнічы трэст №13 Бабруйск піша рэкламу аб вакансіі з заробкам ад 1000 рублёў, а рэальны заробак складае ў сярэднім мінімалку. Гэта ўжо падман насельніцтва. Добрыя спецыялісты вымушаныя звальняцца з будтрэста, каб утрымліваць свае сем'і.

Заробак выплачваецца 30-31 наступнага месяца позна ўвечары. Зімовае спецадзенне не выдаюць. Належных рукавіц і пальчатак - таксама.

У будтрэсце працуе вялікая колькасць людзей з мясцовай "хіміі", бо свабодны будаўнік, які ведае стан рэчаў у будтрэсце, працаваць там не хоча.

З заробкаў згодна з выканаўчым лістом вылічваецца больш за 70% ад поўнага заробку. Рабочаму застаецца менш за 30%. Гэта менш за пражытковы мінімум, што кажа пра тое, што сістэматычна парушаецца артыкул 108 Працоўнага Кодэкса Беларусі.

Але грошы, якія вылічваюцца з заробкаў на аліменты, не даходзяць да маці і жонак ужо вельмі доўгі час.

Будтрэст карыстаецца грашыма на сваё меркаванне.

На рахункі жонак аліменты не паступаюць. Гэтым самым даводзіцца, што ў трэсце квітнее «махлярства», што павінна карацца распачынаннем крымінальных спраў супраць вінаватых асоб», - падсумаваў будаўнік.

Нагадаем, раней сайт Charter97.org пісаў пра будаўніка з Бабруйска, які «зарабіў» - 11 рублёў.