«Ледзяшы вісяць у кватэры!»

Жыхары барысаўскага шматпавярховіка абураныя хібамі будаўнікоў.

У канцы 2018 года на вуліцы Сярэбранікава, 41а, у Барысаве ўвялі ў эксплуатацыю новы дом. Аднак законных уладальнікаў не радуюць доўгачаканыя «квадраты». Аб праблеме абураныя жыхары распавялі першаму намесніку старшыні Менаблвыканкама Ігару Макару падчас жывой лініі, піша mlyn.by.

- Вокны «плывуць-цякуць», пайшла вільготнасць, дзеці гуляюць з ледзяшамі, не выходзячы на двор! - эмацыйна канстатавала Ганна Валер'еўна. - Ці звярталіся ў будаўнічы трэст №21, які будаваў гэты дом, у раённае УКБ. Нам адказалі, што, маўляў, кватэру прынялі - цяпер гэта вашыя праблемы. Учора выклікала платнага майстра для рамонту вокнаў, які сказаў, што праёмы не запененыя, няма фурнітуры. Крэдыт за гэтую кватэру трэба выплачваць 40 гадоў. Я шматдзетная маці. Што мне рабіць?

З такой жа скаргай звярнулася і іншы наваселец злашчаснага шматпавярховіка:

- У нас на аконных адхонах - цвіль, чарната. Як засяліліся, перахварэлі за два тыдні ўсёй сям'ёй. У жылым памяшканні вільгаць. Спецыялісты кажуць, што трэба мяняць акно, - наракала на дыскамфорт Аксана Мікалаеўна.

Ігар Макар звязаўся са старшынём Барысаўскага райвыканкама Генадзем Дзенгалевым, які растлумачыў:

- Гэты зварот патрабуе дэталёвага вывучэння з выездам на месца. У панядзелак з раніцы да заяўніцы прыбудуць спецыялісты з управы капітальнага будаўніцтва райвыканкама. Калі факты пацвердзяцца, за такія хібы будаўнічая арганізацыя і наглядныя службы, безумоўна, панясуць пакаранне ў адпаведнасці з законам. Дольнікі не павінны аплачваць хібы ды адчуваць такія нязручнасці.