Магілёўскі актывіст: Начальнік ДАІ хлусіць
8- 16.01.2019, 11:28
- 19,824
Жыхары Магілёва абураныя станам дарог.
У лістападзе 2018 года актывіст Аляксандр Хамратаў паскардзіўся ў абласную ўправу ДАІ на вялікія дарожныя ямы на выездзе з завулка Мечнікава на вуліцу Крупскай (гэта недалёка ад палаца гімнастыкі), піша магілёўская «Вясна».
Паводле ягоных слоў, асфальт знаходзіцца ў бядотным стане ўжо больш за год. Асабліва шмат праблем ямы чыняць у цёплую пару года.
- Больш за тое, людзей часта штрафавалі за аб'езд гэтых ям. Я напісаў зварот у ДАІ, каб там дапамаглі выправіць сітуацыю, бо яны ўпаўнаважаныя караць балансатрымальнікаў дарог, - распавёў Хамратаў.
Начальнік управы ДАІ УУС Магілёўскага аблвыканкама Міхаіл Неўмяржыцкі ў адказ напісаў актывісту, што стан праезнай часткі ў паказаным месцы адпавядае патрабаванням нарматыўна-тэхнічных актаў. Паводле ягоных слоў, гэта пацвердзіла праверка на месцы ў снежні 2018 года.
Неўмяржыцкі прапанаваў Хамратаву звярнуцца ў дарожна-маставое прадпрыемства, калі ён выявіў дэфекты асфальтавага палатна.
Актывіста такі адказ не задаволіў і ён надумаў асабіста вымераць глыбіню ям, якія «адпавядаюць патрабаванням актаў»:
- Выдаталася часіна і я паглядзеў, ці ўсё так, як піша начальнік ДАІ. Высветлілася, ён хлусіць. Там ямы глыбінёй 10-13 сантыметраў і шырынёй у паўметра, - абурыўся Хамратаў. Свае вымярэнні ён зафіксаваў на фота.
Адказ начальніка ДАІ актывіст абскардзіў ва УУС Магілёўскага аблвыканкама.