26 сакавiка 2019, aўторак, 9:52
Выклік для кожнага
Рубрыкі

Сюрпрыз ад выканкама: беларуска павінна заплаціць 26 тысяч за інжынерныя сеткі

23

Без аплаты электраацяплення не будзе.

Каб ацяпляць свой новы дом электрычнасцю паводле нізкага тарыфу, у домаўладальніцы з Барысава Раісы ўжо ўсё прадугледжана: дазвол для выкарыстання магутнасці сеткі-30 кВт, электраправодная падлога і асобны лічыльнік. "Прэзідэнт абяцаў стымуляваць энэргаспажыванне з уводам АЭС, таму мы сістэму ацяплення рабілі з разліку на танную энэргію", - кажа яна. Аднак яе дом цяпер ацяпляецца камінам і абагравальнікамі — энэргасеткі адмаўляюцца пламбаваць лічыльнік на электраацяпленне. Прычына - мясцовы выканкам адмаўляецца ўводзіць дом у эксплуатацыю, пакуль Раіса не выплаціць 26 тысяч рублёў кампенсацыі за інжынерныя сеткі на адцінку, піша tut.by.

Надзел на новай вуліцы Шпітальнай Раіса купляла ў сакавіку 2017 года з аўкцыёну. У апісанні аўкцыённага лота на сайце выканкама і ў газеце "Адзінства" было пазначана, што зямельныя надзелы маюць электрычнасць, ваду і газ, таму ахвотных іх купіць было звышдастаткова. Адпаведна, кошт зямлі падчас таргоў сур'ёзна вырас — да 40 тысяч рублёў за 9 сотак. Напраўду ж камунікацый у гэтым раёне не было.

- Мы з суседзямі хадзілі да нашага старога старшыні на прыём, пыталіся ў яго, дзе ж камунікацыі? - распавядае Раіса. - Ён нам сказаў, што гэта ў мясцовай газеце нешта наблыталі. Але ўсім жа зразумела, што рэдакцыя перадрукавала інфармацыю з сайта выканкама. Увогуле, пытанні з сеткамі пачалі разглядацца ўжо за новым кіраўніцтвам горада - у пачатку 2018 годзе на вуліцы зрабілі водаправод, правялі электрычнасць, выраўнялі дарогу. З суседзямі стварылі кааператыў і за свой кошт правялі цэнтральную каналізацыю.

Дом Раісы пабудаваўся ў сціснутыя тэрміны - 20 снежня 2018 года яна падала заяву аб пачатку працэдуры ўводу ў эксплуатацыю. Акты ўводу падпісалі і ў водаканале, і ў энэрганаглядзе.

- Усе службы былі пройдзеныя, і раптам нам у аддзеле архітэктуры кажуць выплаціць кампенсацыю за інжынерныя сеткі на адцінку, згодна з пастановай Саўміна №298, інакш дом у эксплуатацыю не ўвядуць. І выстаўляюць рахунак - 26 тысяч рублёў, - кажа Раіса. - Гэта стала для нас шокам - калі мы куплялі надзел, ніхто нам не казаў пра існаванне гэтай пастановы, у дамове таксама пра гэта няма. І калі мы атрымлівалі дазвол на будаўніцтва ў выканкаме - таксама ніхто ні слова, ні паўслова. На прыёме ў райвыканкаме нам сказалі, што няведанне закона не вызваляе ад адказнасці. Але тут жа зусім іншае - з юрыдычнага пункту гледжання гэта парушэнне дамоўных стасункаў.

Неабходнасць кампенсацыі выдаткаў дзяржавы на будаўніцтва інжынерных сетак і дарог была прадугледжаная ўказам №26 яшчэ ў 2014 годзе, але пра цяжкасці з яго выкарыстаннем загаварылі толькі нядаўна. Людзі, якія набылі зямельныя надзелы пасля 1 красавіка 2014 года (з гэтага дня ўвайшла ў дзеянне пастанова №298) сутыкнуліся з нечаканай праблемай. Каб увесці сваё жыллё ў эксплуатацыю, трэба заплаціць кампенсацыю бюджэту за інжынерныя сеткі ў населеным пункце.

Паводле той жа пастановы №298, перад тым як выдаць дазвол на будаўніцтва, нам павінны былі паведаміць пра гэта.

Пазней высветлілася, што землеўпарадкавальнай службай пры ацэнцы кадастравага кошту надзела камунікацыі не былі ўлічаныя. Затое іх не забыліся ва УКБ.

- Ва УКБ я папрасіла разлік — за што я павінна заплаціць і колькі каштавала будаўніцтва гэтых сетак.

У лісце УКБ Барысаўскага раёна тлумачыцца, што сума кампенсаваных выдаткаў на будаўніцтва, у тым ліку праектаванне, аб'ектаў размеркавальнай інжынернай і транспартнай інфраструктуры да зямельнага надзелу разлічваецца згодна з зацверджанымі ўдзельнымі паказчыкамі Барысаўскага раёна і магутнасцямі аб'ектаў інфраструктуры да дома. То бок, гэтая сума не залежыць ад фактычных выдаткаў праектавання і будаўніцтва інжынерных сетак для надзелаў на вуліцы Шпітальнай.

- Чаму я як плацельшчык не маю права ведаць, колькі гэта каштавала? Калі мы за свой кошт будавалі каналізацыю, то ўсё было вельмі зразумела, за што і колькі мы плацім. Гэтак жа павінна быць і з іншымі сеткамі - магчыма, жыхарам вуліцы танней было б правесці гэтыя камунікацыі - і электрычнасць і ваду - за свой кошт.

Вось які разлік падаў УКБ:

Кампенсацыя за водаправод склала 170,32 рубля.

Даражэй за ўсё — за кошт электрасеткі. 25 тысяч рублёў.

Не забыліся пра дарогу - яшчэ 806 рублёў. Разам-26 тысяч рублёў.

Надзел на вуліцы Шпітальнай у Барысаве пры такіх абставінах становіцца "залатым" - з улікам сумы кампенсацыі ён каштавацьме 66 тысяч рублёў. Раіса кажа, што калі б аб дадатковых выдатках ведала загадзя, то наўрад ці яна купляла б гэтую зямлю.

- У нас двое дзяцей, іншай жылплошчы няма, усе сілы, грошы, у тым ліку крэдытныя, кінулі на будаўніцтва гэтага дома, - кажа Раіса. - Гэтая сума для нас непасільная. Калі людзям трэба будзе гэта ўсё аплачваць, то дзяржаве варта было б прадугледзець растэрміноўку - як такую суму можна адразу выплаціць з заробкам 700-800 рублёў? Мы збіраемся звяртацца з заявай у Менскаблвыканкам аб праверцы гэтых разлікаў. Магчыма, што прыйдзецца звяртацца яшчэ і ў суд.

Цяпер дом Раісы абаграваецца фактычна за кошт каміна і абагравальнікаў: падключаць электрападлогу да бытавой сеткі, а не выдзеленай для гэтага асобнай лініі нельга - яна не разлічаная на такія нагрузкі. І пакуль дом не ўведзены ў эксплуатацыю, электрасеткі згодна з законам не могуць апламбаваць лічыльнік на ацяпленне. За спажытую электраэнэргію даводзіцца плаціць па 18 капеек за кВт замест 3,35 (паводле тарыфу на ацяпленне, які дзейнічае з 1 студзеня 2019 года).