Амбасадары ЕЗ узгаднілі санкцыі супраць падазраваных у атручванні Скрыпаля
7- 16.01.2019, 16:58
- 12,086
У найбліжэйшыя дні Еўразвяз зацвердзіць санкцыі супраць расейскіх агентаў.
Амбасадары Еўрапейскага Звязу 16 студзеня ўзгаднілі санкцыі супраць чатырох агентаў расейскай выведкі, сярод якіх двое падазраваных у атручванні былога расейскага шпіёна Сяргея Скрыпаля ў брытанскім Солсберы, паведаміў у Twitter брусэльскі карэспандэнт «Радыё Свабода» Рыкард Ёзвяк, піша «Гордон».
З ягоных слоў, Еўразвяз зацвердзіць санкцыі 21 студзеня.
«Сёння паслы ЕЗ дамовіліся пра санкцыі супраць чатырох афіцэраў ГРУ, у тым ліку двух «турыстаў» з Солсберы. Пяць чалавек з Сірыі таксама будуць уключаныя. Санкцыі будуць адобраныя ЕЗ...у панядзелак, і будуць першымі ў рамках новага рэжыму санкцыяў у дачыненні да хімічнай зброі», - напісаў Ёзвяк.
EU ambs have today agreed to sanction 4 GRU officers, including the two #Salisbury "tourists". 5 ppl from #Syria will also be listed. the sanctions will be approved by EU for mins on Mon & are the first under the new chemical weapons sanctions regime. #Russia #Ukraine
— Rikard Jozwiak (@RikardJozwiak) 16 января 2019 г.
Скрыпаля і ягоную дачку Юлію атруцілі ў сакавіку 2018 года ў брытанскім Солсберы распрацаваным у РФ нервова-паралітычным агентам «Навічок». Ім удалося выжыць пасля замаху.
5 верасня 2018 года ў пракуратуры Брытаніі назвалі прозвішчы, пад якімі падазраваныя ў атручванні заехалі ў краіну - Аляксандр Пятроў і Руслан Башыраў. Прэм'ер-міністр краіны Тэрэза Мэй падкрэсліла, што яны з'яўляюцца афіцэрамі ГРУ.
Двое мужчын, чые фота апублікавала брытанская пракуратура, заявілі ў тэлеінтэрв'ю, што сапраўды былі ў Солсберы ў сакавіку, але ездзілі туды выключна на экскурсію. Сваё дачыненне да атручвання і да працы ў ГРУ яны адмаўлялі.
У расследаванні групы Bellingcat і The Insider гаворыцца, што ва ўчыненні хіматакі падазраюцца афіцэры Галоўнай управы Генштаба РФ Анатоль Чапіга і Аляксандр Мішкін - гэта сапраўдныя імёны «Пятрова» і «Башырава».
У снежні 2018 года Міністэрства фінансаў ЗША ўнесла ў санкцыйны спіс 18 расейцаў, сярод якіх Чапіга і Мішкін.
6 студзеня 2019 года The Telegraph паведаміла, што ўлады Вялікай Брытаніі ўстанавілі ўсе акалічнасці замаху на Скрыпалёў, а таксама след, які проста вядзе да прэзідэнта Расеі Пуціна.
