24 сакавiка 2019, Нядзеля, 19:12
Выклік для кожнага
Рубрыкі

Жыхар Брагіна запатрабаваў праверыць «дармаедскі» дэкрэт на канстытуцыйнасць

11
АРХІЎНАЕ ФОТА

Уладзімір Тэрэмецкі атрымаў «ліст шчасця» ў канцы снежня.

52-гадовы жыхар Брагіна Уладзімір Тэрэмецкі атрымаў «ліст шчасця» ў канцы снежня. Мужчына шэсць гадоў прапрацаваў юрыстам у камунгасе, пасля чаго перайшоў вартаўніком на станцыю абезжалезвання. Год таму яго скарацілі, і з таго часу новую занятасць знайсці не ўдалося. Засталося крыху часу, каб пацвердзіць занятасць, аднак мужчына пакуль не звяртаўся ў камісію, піша tut.by.

Складанасць, з якой сутыкнуўся Уладзімір, - адсутнасць вакансій з «больш-менш годным заробкам».

- Пасля скарачэння я шукаў працу і прыходзіў у мясцовае кіраванне. Але мне прапаноўвалі 150-200 рублёў. Вартаўніком я атрымліваў дзесьці 300 рублёў, але там працаваў дзень праз тры, - успамінае мужчына.

Уладзімір тлумачыць, што пакуль павелічэнне тарыфаў яго не датычыць - у доме няма падагрэву вады, толькі газавыя калонкі. Павышэнне закране сям'ю толькі ў кастрычніку.

Мужчына напісаў два лісты 29 снежня ў Брагінскі райвыканкам і Гомельскі аблвыканкам, але «адказу яшчэ не было». Там ён просіць выключыць яго з базы дармаедаў, а таксама патрабуе праверыць дэкрэт на канстытуцыйнасць праз «прымусу да працы». Акрамя гэтага Уладзіміра хвалюе, што яго звесткі патрапяць у агульнадаступную базу, якой змогуць скарыстацца розныя дзяржорганы.

Пакуль ёсць шанец, што ўдасца даказаць сваю «занятасць у эканоміцы»: у мужчыны за 20 км ад Брагіна ёсць дом, які застаўся ад маці, і 50 гектараў зямлі. Цяпер Уладзімір там трымае гаспадарку: сочыць за агародам і падкормлівае курэй. Так як у горадзе няма працы, ён ездзіць на дачу практычна кожны дзень. Цяпер адзіны сямейны даход - заробак жонкі, якая працуе загадчыцай аптэкі. Жанчына атрымлівае прыкладна 800-900 рублёў у месяц.

У сям'і ёсць сын, які другі год навучаецца ў Польшчы. Уладзімір мяркуе, што яму таксама можа прыйсці апавяшчэнне. Калі гэта здарыцца, мужчыне давядзецца перакладаць даведку, якая пацвярджае навучанне, што абыдзецца прыкладна ў 30 рублёў.

- Ён дасылаў такі дакумент для ваенкамата - я яго туды занёс, каб пацвердзіць трохгадовую вучобу. Гэтая паперка - на польскай мове. Каб перакласці, мне трэба ехаць у Гомель да перакладчыка, 15 рублёў плаціць. Потым прывозіць у Брагін, каб натарыус зацвердзіў, таксама 15 рублёў плаціць. Я не працую. Дзе гэтыя грошы ўзяць?